Məlumdur ki diabet xəstələrində ürək damar xəstəlikləri riski normal insanlara nisbətən daha yüksək olur.

Azmedinfo.az xəbər verir ki, endokrinoloq Fərhad Burzunun sözlərinə görə, bu səbəbdən uzun illərdir "Aspirin"in diabet xəstələrində qoruyucu məqsədlə istifadə olunub olunmayacağı sualı tibb dünyasında geniş müzakirə edilir. Son illərdə bu dərmanın profilaktik istifadəsinə daha ehtiyatla yanaşılsa da yeni bir araşdırma diabet xəstələri üçün fərqli və ümidverici nəticələr ortaya qoyub.

Amerikan Ürək Assosiasiyasının illik toplantısında təqdim edilən və ABŞ-da aparılan bu böyük müşahidə araşdırmasında ikinci tip diabeti olan 11 mindən çox insanın sağlamlıq məlumatları 10 il ərzində yaxından izlənilib. Ürək damar riski orta və ya yüksək olan bu insanlar arasında "Aspirin" istifadə edənlərlə etməyənlərin göstəriciləri müqayisə edilib. Nəticələr göstərib ki aşağı doza "Aspirin" istifadə edən diabet xəstələrində ürək tutması və işemik insult riski ilə yanaşı ümumi ölüm riski də əhəmiyyətli dərəcədə aşağı düşüb.

Lakin ekspert xəbərdarlıq edir ki, "Aspirin" hər kəsə uyğun deyil və uzun müddətli istifadə zamanı qanaxma riski arta bilər. Sözügedən araşdırmada qanaxma riski yüksək olan şəxslərin iştirak etmədiyini nəzərə alaraq real həyatda bu barədə qərar mütləq fərdi şəkildə verilməlidir. Bu səbəbdən dərmanı yalnız həkimlə məsləhətləşərək və bütün risklər dəyərləndirildikdən sonra istifadə etmək ən doğru yanaşmadır.