Son günlərdə müşahidə olunan kəskin hava dəyişiklikləri, temperatur dalğalanmaları və atmosfer təzyiqinin normadan yüksək olması insan orqanizmində, xüsusən də meteohəssas şəxslərdə qan təzyiqinin oynamasına səbəb olur.

Azmedinfo.az xəbər verir ki, mütəxəssislərin sözlərinə görə, atmosferdəki bu qeyri-sabitlik damarların daralmasına və ürək-qan dövranı sisteminin gərgin işləməsinə yol açaraq hipertoniya riskini artırır. Bu cür hallarda qida rasionuna təzyiqi tənzimləyən sitrus meyvələr (limon, portağal), giləmeyvələr (moruq, çiyələk), həmçinin ispanaq, çuğundur, kərəviz və pomidor kimi tərəvəzləri əlavə etmək olduqca faydalıdır.

Belə hava şəraitində çaytikanı da tərkibindəki zəngin vitaminlər, antioksidantlar və omeqa yağ turşuları sayəsində ürək-damar sistemi və təzyiq üçün ən effektiv təbii vasitələrdən biri kimi çıxış edir. Bu bitki qan damarlarının elastikliyini artırıb xolesterin səviyyəsini aşağı salmaqla yüksək təzyiqin tənzimlənməsinə və damar sərtliyinin qarşısının alınmasına kömək edir.

Müalicəvi təsirdən yararlanmaq üçün bitkinin meyvələri ilə yanaşı, yarpaq və çubuqlarından ev şəraitində müxtəlif üsullarla istifadə etmək mümkündür. Məsələn, qurudulmuş yarpaq və xırda çubuqları qaynar suda dəmləyərək çay kimi içmək damar divarlarını möhkəmləndirir, təzə meyvələrin suyunu çıxarıb balla qarışdıraraq qəbul etmək isə orqanizmin ümumi tonusunu artırır.

Lakin yüksək təzyiqdən əziyyət çəkən şəxslər bu vasitələrdən istifadə etməzdən əvvəl mütləq həkimlə məsləhətləşməlidirlər, çünki bitki mənşəli dəmləmələr bəzi preparatlarla qarşılıqlı təsirə girə bilər. Həmçinin təzyiqin kəskin yüksəldiyi krizis hallarında çaytikanı yalnız köməkçi vasitə kimi düşünülməli və peşəkar tibbi müalicəni əvəz etməməlidir.