Azərbaycanda beyin ölümü qeydə alınmış donor 6 xəstəyə həyat verib

21 Yanvar 2026

744

Azərbaycanda beyin ölümü qeydə alınmış donor 6 xəstəyə həyat verib

Ötən ilin oktyabr ayında beyin ölümü qeydə alınmış bir şəxsdən ailəsinin razılığı əsasında 6 orqan götürülərək ehtiyacı olan xəstələrə köçürülüb. Donorluq prosesi müvafiq tibbi protokollara uyğun şəkildə həyata keçirilib.

Azmedinfo.az xəbər verir ki, Orqan Donorluğu və Transplantasiyası üzrə Koordinasiya Mərkəzinin məlumatına görə, nəticədə, müxtəlif xəstəliklərdən əziyyət çəkən 6 insan sağlamlığına qovuşub. Hadisə ölkədə postmortem orqan donorluğunun inkişafı baxımından mühüm nümunə kimi qiymətləndirilir.

Səhiyyə Nazirliyi Orqan Donorluğu və Transplantasiyası üzrə Koordinasiya Mərkəzinin İdarə Heyətinin sədri Yeganə Abbasova məsələ ilə bağlı açıqlamasında bildirib: “Beyin ölümü keçirmiş donorun orqanlarının bağışlanması həm tibbi, həm də mənəvi baxımdan son dərəcə əhəmiyyətlidir. Bu qərar altı insanın həyatını xilas etməyə və həyat keyfiyyətini əhəmiyyətli dərəcədə yaxşılaşdırmağa imkan verdi. Bu nəcib addım cəmiyyətimizdə orqan donorluğuna münasibətin formalaşması və inkişafı baxımından xüsusi önəm daşıyır.”

Səhiyyə Nazirliyi ODTKM insan həyatının xilası üçün bir daha vətəndaşları orqan donorluğu ilə bağlı məlumatlanmağa və bu mövzuda maarifləndirici təşəbbüslərə dəstək verməyə çağırır.