İnsan orqanizmində bir cüt damaq, bir cüt boru, bir udlaq, bir dil badamcığı olmaqla, 6 badamcıq var. Orqanizmə hava-damcı yolu ilə daxil olan mikroorqanizmlərin 70%-i badamcıqlar tərəfindən zərərsizləşdirilir. Bundan başqa badamcıqlar bioloji maddələr sintez edir ki, bu maddələr qanyaranmada iştirak edən hüceyrələrin formalaşmasında iştirak edir.

 

Bakı Baş Səhiyyə Mərkəzinin 9 nömrəli Uşaq Poliklinikasının həkim-otorinolorinqoloqu Zemfira Hümbətovanın sözlərinə görə, onlar düzgün müalicə olunmayanda daha ciddi fəsadlar yaranır: “Damaq badamcıqları xəstəlikləri el arasında “angina” adlanır ki, bu da badamcıqların iltihabi xəstəliyidir. Ümumilikdə isə xəstəliklər immun sisteminin zəifləməsi ilə yaranır. Hər hansı xəstəliyin düzgün getməyən və ya natamam aparılan müalicəsi nəticəsində badamcıqlar böyüyərək orqanizmə zərər vurmağa başlayır. Damaq badamcıqlarının ölçü cəhətdən 1 və 2-ci dərəcəli böyüməsi isə əməliyyata göstərişə əsas vermir”.

 

Həkim-otorinolorinqoloq bildirir ki, udlaq badamcığının bir və ikinci dərəcəli böyüməsində də əməliyyata ehtiyac olmur, lakin ikinci dərəcə böyümə burunda problem yaradırsa, əməliyyat haqqında düşünmək olar: “Udlaq damaqcığının üçüncü dərəcəli böyüməsi zamanı da əməliyyata ehtiyac yaranır. Damaq badamcıqlarının xəstəlikləri xroniki tonzilit adlanır. Bu isə müalicə ilə aradan qalxan prosesdir. Bu zaman fizioterapevtik üsullarla profilaktiki müalicə aparılır. Yaz və payız fəslində aparılan profilaktiki müalicə əksər hallarda effektiv olur. Əgər müalicə ilə irəliləyiş əldə edilməzsə, cərrahi əməliyyatla problem aradan qaldırıla bilər. Əksər vətəndaşlarda belə fikir formalaşıb ki, əgər badamcıqlar böyüyübsə, mütləq əməliyyat edilməlidir. Lakin unutmaq olmaz ki, badamcıqlar orqanizmdə çox böyük rola malikdir və mümkün qədər badamcıqlar saxlanılmalı, xəstəlik aşkarlandığı halda müalicə edilməlidir”.

 

Z.Hümbətovanın sözlərinə görə, badamcıqlar ürək və böyrək problemləri yaradarsa, bu zaman əməliyyata ehtiyac olur. Həkim mütəxəssis cərrahi əməliyyat zamanı diqqət edilməli məqamları da qeyd edib: “Əsasən, badamcıq əməliyyatı üçün 4 yaş nəzərdə tutulub, amma istisna hallarda yaş həddi gözlənilməyə bilər. Badamcıqlarda xəstəliyin yaranmasının qarşısı alınmalıdır. İlk növbədə mütləq gigiyenik tədbirlər görülməlidir. Ağız və burun daim təmiz saxlanılmalı, dişlər vaxtında təmizlənməli və müayinə edilməlidir. Əgər dişdə və ya diş ətində xəstəlik əmələ gəlibsə, bu, dərhal müalicə edilməlidir”.