Əgər insanın ayaqları daim soyuqdursa, bu, orqanizmdəki gizli pozuntulardan, o cümlədən qalxanvari vəzi və təşviş pozuntularından xəbər verə bilər.

Azmedinfo.az "El Economista" nəşrinə istinadən yazır ki, podoloq Manu Vidalın sözlərinə görə, çox vaxt ayaq pəncələrinin soyumasının əsas səbəbi həyat tərzi ilə bağlıdır. Xüsusilə siqaret çəkmək, spirtli içki qəbulu, dar ayaqqabı və corab geyinmək, həmçinin aşağı fiziki aktivlik buna zəmin yaradır. Bu simptomlar qan dövranının pisləşdiyini göstərir və ətraflara optimal qan axınının qarşısını alır.

Lakin Vidal vurğulayır ki, bu vəziyyət daha ciddi problemlərin də göstəricisi ola bilər. Belə ki, ayaqların daim soyuq olması tez-tez qalxanvari vəzinin fəaliyyətindəki pozuntularla əlaqəli olur. Bu vəzin funksiyası aşağı düşdükdə maddələr mübadiləsi ləngiyir, nəticədə istilik tənzimlənməsi pisləşir və ətraflar daim donmağa başlayır.

Digər mühüm faktor isə insanın psixoemosional vəziyyətidir. Təşviş və xroniki stres damarlarda spazm yaradaraq ayaqların qan təchizatını pisləşdirir, bu isə hətta isti mühitdə belə soyuqluq hissinin yaranmasına səbəb olur. Bundan əlavə, soyuq ayaqlar hipertoniya, yüksək xolesterin və ateroskleroz kimi ürək-damar xəstəliklərinin təzahürü kimi də meydana çıxa bilər. Belə hallarda bütün bu simptomlar birbaşa qan axınının pozulması ilə bağlı olur.