İspaniya Milli Xərçəng Araşdırmaları Mərkəzinin (CNIO) tədqiqatçıları ən aqressiv onkoloji xəstəliklərdən biri olan mədəaltı vəzi xərçənginin inkişafını göstərən erkən simptomlar kompleksini müəyyən ediblər.

Azmedinfo.az xəbər verir ki, tədqiqatın nəticələri "Proceedings of the National Academy of Sciences" (PNAS) jurnalında dərc olunub.

Çox vaxt şişin inkişafı hüceyrələrin nəzarətsiz çoxalmasına təkan verən KRAS genindəki mutasiya ilə bağlı olur. Xəstəliyin ilkin təşviş siqnalları iştahsızlıq, səbəbsiz yorğunluq, qarın nahiyəsində ağrı və ya diskomfort, beldə xoşagəlməz hisslər və izah edilə bilməyən çəki itkisi hesab olunur. Lakin ən erkən mərhələdə bu əlamətlərin belə olmaması diaqnostika prosesini xeyli çətinləşdirir.

Məhz bu səbəbdən diaqnoz qoyulduqdan sonra orta ömür müddəti təxminən üç ay təşkil edir və yalnız xəstələrin çox az faizi beş ilə qədər yaşaya bilir. Aparılan tədqiqat çərçivəsində alimlər həmçinin bədxassəli hüceyrələrin böyüməsi üçün istifadə etdiyi üç əsas biokimyəvi yolu eyni vaxtda bloklayan eksperimental üçlü dərman kombinasiyasından ibarət perspektivli terapiya üsulu təklif ediblər.

Heyvanlar üzərində aparılan sınaqlarda bu yeni müalicə üsulu yüksək effektivlik göstərərək mədəaltı vəzi şişlərinin tamamilə yox edilməsinə imkan yaradıb. Hazırda növbəti mərhələ kimi bu perspektivli metodun insanlar üzərində klinik sınaqlarına və praktikaya tətbiqinə başlanılması gözlənilir.