Səhiyyə Nazirliyinin Elmi-Tədqiqat Kardiologiya İnstitutunun direktoru, professor Gülnaz Dadaşova İctimai TV-nin "Xəbərimiz var" proqramının qonağı olub. Həkim son vaxtlar gənclər arasında ürək problemlərinin kəskin artması ilə bağlı ciddi xəbərdarlıq edib. Ekspert bildirib ki, enerji içkilərindən hədsiz istifadə gənclərin təcili yardıma müraciət etmə tezliyini artırıb.

Azmedinfo.az xəbər verir ki, kardioloqun sözlərinə görə, bu içkilərin yaratdığı süni enerji hissi ürək əzələsində ciddi kardiomiopatiya və distrofiya kimi ağır fəsadlara yol açır. Gülnaz Dadaşovanın sözlərinə görə, ürəyin "motoru" bir dəfə sıradan çıxdıqdan sonra geriyə tək yol kimi yalnız ürək köçürülməsi qalır.

Həkim uşaq yaşlarında belə damar tutulmalarına rast gəlindiyini vurğulayaraq, yeni və mühüm risk faktoru olan LPA (Lipoprotein a) amilinə diqqət çəkib. O, hər bir gəncin həyatında ən azı bir dəfə bu faktoru yoxlatmasının zəruri olduğunu qeyd edib. Bu analiz gələcəkdə yarana biləcək qəfil ürək-damar fəsadlarının qarşısını almaq üçün həyati əhəmiyyət kəsb edir.

Mənfi meyillərlə yanaşı, professor Gülnaz Dadaşova ölkə səhiyyəsinin bu sahədəki uğurlarını da yüksək qiymətləndirib. Hazırda Azərbaycanda icra oluna bilməyən heç bir kardioloji əməliyyatın qalmadığını vurğulayan ekspert, xüsusilə ən keyfiyyətli stentlərin qoyulması və balonoplastika, mitral və aorta qüsurlarının invaziv yolla (kəsiksiz) təmiri və dəyişdirilməsi kimi xidmətlərin yüksək səviyyədə həyata keçirildiyini bildirib.

Ekspert Azərbaycan səhiyyəsinin ən böyük nailiyyətlərindən biri olan ürək transplantasiyası əməliyyatlarının uğurlu icra edildiyini də deyib.

Professor Gülnaz Dadaşova yekunda qeyd edib ki, texnoloji imkanların genişliyinə baxmayaraq, əsas hədəf maariflənmə yolu ilə xəstəliklərin qarşısını öncədən almaq olmalıdır.