Səhiyyə Nazirliyi Ə.Əliyev adına Azərbaycan Dövlət Həkimləri Təkmilləşdirmə İnstitutunun mamalıq və ginekologiya kafedrasında reproduktiv tibbdə süni intellekt texnologiyalarının tətbiqi istiqamətində genişmiqyaslı elmi-tədqiqat işləri aparılır.

Azmedinfo.az xəbər veri ki, bu tədqiqatlar nəticəsində ekstrakorporal mayalanma (EKM) proqramlarının uğur şansını əvvəlcədən proqnozlaşdıran süni intellektə əsaslanan xüsusi model hazırlanıb.

Sözügedən model klinik, laborator və embrioloji göstəricilərin kompleks analizini apararaq hamiləlik ehtimalını dəqiqliklə qiymətləndirməyə imkan verir. Bu texnoloji yenilik hər bir pasiyent üçün fərdiləşdirilmiş müalicə strategiyasının müəyyən edilməsinə və həkimlərin qərarvermə prosesinin elmi əsaslarla gücləndirilməsinə şərait yaradır. Ümumilikdə, bu müasir yanaşmanın tətbiqi reproduktiv sağlamlıq sahəsində müalicə effektivliyinin artırılmasına və daha uğurlu nəticələrin əldə olunmasına xidmət edir.