Səhiyyə sistemində klinik protokolların rolu və onların gündəlik tibbi praktikada tətbiqinin əhəmiyyəti barədə tanınmış həkim və millət vəkili Rəşad Mahmudov fikirlərini bölüşüb.

Azmedinfo.az xəbər verir ki, onun sözlərinə görə, klinik protokollar həkimin peşəkar fəaliyyətində əsas istiqaməti müəyyən edən, praktik qərarverməni sistemləşdirən mühüm istinad mənbəyidir.

Ekspert vurğulayır ki, klinik protokollar müasir səhiyyə sisteminin əsas dayaqlarından biri olmaqla yanaşı, elmi sübutlara əsaslanan və klinik prosesləri standartlaşdıran strateji yol xəritəsi rolunu oynayır. Bu sənədlər eyni diaqnoz və klinik vəziyyət qarşısında müxtəlif tibb müəssisələrində və fərqli həkimlər tərəfindən oxşar, sübuta əsaslanan yanaşmanın tətbiqinə imkan yaradır. Beləliklə, tibbi xidmətin keyfiyyəti qorunur, eyni zamanda səhiyyə xidmətində ədalətlilik təmin edilir.

Ekspertin fikrincə, klinik protokollar sürətli və rasional qərarvermə baxımından da əvəzolunmazdır. Xüsusilə təcili və kritik hallarda standart alqoritmlərin mövcudluğu vaxt itkisini minimuma endirir, klinik prosesin effektivliyini artırır və müdaxilələrin daha məqsədyönlü aparılmasına şərait yaradır.

Bununla yanaşı, protokollar insan faktorundan qaynaqlanan səhvlərin azalmasına mühüm töhfə verir. Standartlaşdırılmış yanaşma riskləri minimuma endirir, nəzarət mexanizmlərini gücləndirir və xəstə təhlükəsizliyini prioritetə çevirir. Bu baxımdan klinik protokollar yalnız idarəetmə aləti deyil, həm də səhiyyə sistemində keyfiyyətin, təhlükəsizliyin və etibarlılığın təminatçısı kimi çıxış edir.

Bununla belə, ekspert təəssüflə qeyd edir ki, ölkədə klinik protokolların tətbiqi və düzgün istifadəsi hələ də arzuolunan səviyyədə deyil və bu istiqamətdə sistemli yanaşmanın gücləndirilməsinə ehtiyac var.