Müqəddəs Ramazan ayının artıq  ilk həftəsi tamam olur.

Azmedino.az xəbər verir ki, mütəxəssislərin rəyinə əsasən oruc tutarkən bədən sağlamlığını qorumaq və enerji səviyyəsini sabit saxlamaq böyük önəm kəsb edir.

Ramazan ayında bədən balansını qorumaq üçün sahur və iftar menyularında proteinlə zəngin qidalara üstünlük verilməlidir. Gün ərzində susuzluq yaşamamaq üçün sahurda duzlu qidalardan uzaq durmaq və kifayət qədər su içmək vacibdir. İftar vaxtı qan şəkərinin birdən yüksəlməməsi üçün yeməyə ilıq şorba və ya xurma ilə başlamaq tövsiyə olunur.

Yeməkləri tələsmədən yaxşıca çeynəyərək yemək həzm sisteminin rahat işləməsinə kömək edir. Ağır və yağlı qidalar əvəzinə sobada bişmiş tərəvəzlər və qaynadılmış ət məhsulları seçilməlidir. Şirniyyat ehtiyacını ödəmək üçün ağır xəmir xörəkləri yerinə meyvə və ya südlü desertlərdən istifadə etmək daha faydalıdır.

Bundan əlavə, fiziki aktivliyi qorumaq məqsədilə iftardan təxminən bir saat sonra qısa məsafəli piyada gəzintilər edilməlidir. İftarla sahur arasındakı müddətdə bədənin maye ehtiyacını qarşılamaq üçün az-az və tez-tez su içilməsi mütləqdir. Gün ərzində ağır idman hərəkətlərindən qaçınmaq bədənin hədsiz yorulmasının qarşısını alır.

İntizamlı qidalanma və yüngül hərəkətlilik sayəsində Ramazan ayını həm mənəvi həm də fiziki cəhətdən gümrah keçirmək mümkündür.