Oruc müasir tibbdə sadəcə dini bir ayin deyil, orqanizmin bioloji balansını bərpa edən mühüm bir metabolik tənzimləmə mexanizmi kimi qəbul edilir.

Azmedinfo.az xəbər verir ki, Dövlət Gömrük Komitəsi Tibbi Xidmət İdarəsinin Elmi-Təcrübi Tədris Mərkəzinin rəisi, t.e.d., ürək-damar cərrahı Rəşad Mahmudovun bildirdiyinə görə, düzgün tətbiq olunan oruc bədənin enerji mənbəyini qlükozadan lipid istifadəsinə keçirərək metabolik elastikliyi artırır. Bu proses qaraciyər piylənməsinin azalmasına, "pis" xolesterin səviyyəsinin düşməsinə və insulin həssaslığının yaxşılaşmasına birbaşa xidmət edir.

Ekspertin qeyd etdiyi digər mühüm məqam autofagiya prosesidir ki, bu zaman hüceyrələr öz daxilindəki zədəli hissəcikləri təmizləyərək regenerasiya olunur. Ürək-damar sistemi üçün oruc arterial təzyiqin stabilləşməsi və damar divarlarındakı iltihabi proseslərin azalması baxımından əvəzsizdir. Lakin bütün bu faydalar iftar və sahurda qidalanma intizamından asılıdır. Həddindən artıq şəkərli və yağlı qidalar orucun yaratdığı müsbət effekti sıfırlaya bilər.

Nəticə etibarilə, oruc bizə müasir həyatın itirdiyi ölçü, intizam və tarazlıq prinsiplərini geri qaytarır. Ağır ürək və böyrək çatışmazlığı olan xəstələr isə bu prosesə başlamazdan əvvəl mütləq həkimlə fərdi məsləhətləşmələr aparmalıdırlar.