Demensiyanın yaranması yalnız yaşla bağlı bir problem deyil, burada immun sistem, xroniki infeksiyalar və sinir sistemi mühüm rol oynayır.

Azmedinfo.az xəbər verir ki, endokrinoloq həkim Fərhad Burzunun sözlərinə görə, son elmi araşdırmalar zona (kəmərvari herpes) peyvəndinin demensiya riskinin azalması ilə birbaşa əlaqəli olduğunu ortaya qoyub.

Araşdırmalara əsasən, bu peyvəndi vurduran şəxslərdə 5,5 il ərzində yeni demensiya diaqnozu alma ehtimalı təxminən 2% daha aşağı düşüb.

Bu müsbət təsirin əsas səbəblərindən biri peyvəndin immun sistemini tənzimləyici və neyroprotektiv, yəni sinir qoruyucu xüsusiyyətlərə malik olmasıdır. Digər mühüm ehtimal isə peyvəndin su çiçəyinə səbəb olan varicella zoster virusunun mərkəzi sinir sistemində təkrar aktivləşməsinin qarşısını almasıdır. Məlumdur ki, bu virusun beyində yenidən fəallaşması iltihabi proseslərə təsir edən demensiya riskini ciddi şəkildə artırır.

Həkim "Lancet Neurology" jurnalında dərc olunan tədqiqatlara da diqqət çəkib.

Qeyd edib ki, bəzi alimlərin qənaətinə görə, sözügedən peyvənd digər herpes viruslarının da beyinə göstərə biləcəyi dolayı mənfi təsirləri azalda bilir. Beləliklə, bu elmi yenilik sübut edir ki, peyvəndlər yalnız infeksiyalardan qorunmaq üçün deyil, həm də uzunmüddətli beyin sağlamlığının qorunmasında potensial və strateji rol oynaya bilər.