Azərbaycanın ən qədim və sevilən bayramlarından biri olan Novruzun ilk çərşənbəsi – Su çərşənbəsi bu gün qeyd olunur. Su çərşənbəsi ilə birlikdə yazın müjdəçisi olan Novruzun başlanğıcı hesab edilir. Su insan həyatının ən vacib ünsürlərindən biri olmaqla bərabər, həm də təmizlik, sağlamlıq və yenilənmə rəmzidir.

Qədim inanclara görə, Su çərşənbəsində axar sular təzələnir, təmizlənir və insanlara ruhi, fiziki sağlamlıq bəxş edir. İnsanlar bu gün sübh tezdən bulaq və çay kənarına gedərək, axar su ilə üzlərini yuyar, suyun şəfa verici gücünə inanarlar. Hətta Su çərşənbəsində içilən suyun bədənə sağlamlıq bəxş etdiyi, xəstəliklərdən qoruduğu inancları da mövcuddur.

Su insan orqanizmi üçün əvəzolunmaz bir mənbədir. Bədənin 60%-dən çoxu sudan ibarətdir və sağlam qalmaq üçün gündəlik kifayət qədər su içmək vacibdir. Yetərli miqdarda su qəbul etmək metabolizmi sürətləndirir, immun sistemini gücləndirir, dəriyə parlaqlıq verir və bədənin toksinlərdən təmizlənməsinə kömək edir. Xüsusilə böyrək və həzm sistemi üçün suyun həyati əhəmiyyəti var.

Bu gün Su çərşənbəsini qeyd edərkən, həm də sağlam həyat tərzini təşviq etməyə çağırırıq. Su içməyi gündəlik vərdiş halına gətirmək, təmiz su mənbələrini qorumaq və sağlam bir həyat üçün su balansına diqqət yetirmək hər birimiz üçün vacibdir.

Novruzun ilk çərşənbəsi olan Su çərşənbəsinin hamıya ruzi-bərəkət, sağlamlıq və xoş günlər gətirməsini diləyirik!

Azmedinfo.az