12 mart – Ümumdünya Böyrək Günüdür - azmedinfo.az - Azərbaycan Tibbi İnformasiya və Səhiyyə Portalı

12 mart – Ümumdünya Böyrək Günüdür

12 Mart 2026

272

2006-cı ildən etibarən hər il martın ikinci cümə axşamı Ümumdünya Böyrək Günü kimi qeyd edilir. Ümumdünya Böyrək Günü çərçivəsində elmi-praktik konfranslar təşkil olunur, xəstəliyin profilaktikası, ictimaiyyətin maarifləndirilməsi istiqamətində müzakirələr aparılır.

Azmedinfo.az xəbər verir ki, keçirilən tədbirlərin məqsədi ictimai səhiyyə sahəsində çalışan mütəxəssislərin və ictimaiyyətin diqqətini xroniki böyrək çatışmazlığı, böyrək xəstəliyinin aşkarı və müalicə üsullarına yönəltməkdir.

Böyrəklər insanın ən vacib orqanları olaraq, orqanizmdə qanı təmizləyir və onun kimyəvi balansını saxlamağa yardım edir. Böyrək çatışmazlığı kəskin və xroniki olur. Kəskin böyrək çatışmazlığı xroniki böyrək çatışmazlığı ilə nəticələnə bilər. Bu xəstəliyin dünyada artımına əsas səbəb hipertoniya və şəkərli diabet xəstəliyidir.

Səhiyyə Nazirliyi İctimai Səhiyyə və İslahatlar Mərkəzi (İSİM) tərəfindən bu istiqamətdə müntəzəm olaraq əhali arasında maarifləndirmə aparılır, böyrəklərin sağlamlığını vaxtında qorumaq üçün sağlam həyat tərzi seçmək, düzgün qidalanmaya üstünlük vermək, zərərli vərdişlərdən uzaq olmaq təbliğ və təşviq edilir. Bu, böyrəklərin fəaliyyətinə mənfi təsir edən, böyrək xəstəliklərinin riskini artıran amillərə qarşı ən təsirli mübarizə vasitəsidir.

İSİM tərəfindən hazırlanaraq çap olunan maarifləndirici materiallarla bu link vasitəsilə tanış ola bilərsiniz: https://www.isim.az/az/print/8-Maariflendirme-materiallari