Həzm sisteminin normal fəaliyyətini təmin edən ən mühüm amillərdən biri qida rasionunda liflərin kifayət qədər olmasıdır.

Azmedinfo.az Azərbaycan Cərrahiyyə, Qastroenterologiya və Onkologiya Cəmiyyətinin məlumatına istinadən bildirir ki, tərəvəz və tam taxıl məhsullarının mütəmadi istehlakı orqanizmdə bir çox həyati prosesləri tənzimləyir.

Mütəxəssislər qeyd edirlər ki, liflər sadəcə toxluq hissi yaratmır, eyni zamanda bağırsaq peristaltikasını aktivləşdirərək həzm sistemini hərəkətə gətirir.

Lifli qidalar bağırsaqlarda suyu özünə çəkərək həzm prosesini yumşaldır və qidaların bədəndən keçidini asanlaşdırır. Bu prosesin ən önəmli tərəfi isə orqanizmin toksinlərdən və zərərli qalıqlardan təmizlənməsinə birbaşa kömək etməsidir.

Daha sağlam həzm sistemi, metabolik aktivlik və bədəndə yüngüllük hissi əldə etmək üçün gündəlik rasionda meyvə, tərəvəz və paxlalı bitkilərə daha geniş yer ayrılması tövsiyə olunur.