Azərbaycanda səfərdə olan Ümumdünya Səhiyyə Təşkilatının (ÜST) Baş direktoru Tedros Adhanom Ghebreyesus səhiyyə naziri Teymur Musayevlə birgə nazirliyin professor Gindes adına Respublika Uşaq və Yeniyetmələr üçün Vərəm və Tənəffüs Orqanlarının Xəstəlikləri Sanatoriyasını ziyarət ediblər.

Azmedinfo.az Səhiyyə Nazirliyinin məlumatına istinadən yazır ki, səhiyyə naziri Teymur Musayev müəssisənin fəaliyyəti, uşaqlar və yeniyetmələr arasında vərəm və digər tənəffüs orqanları xəstəliklərinin profilaktikası, erkən diaqnostikası, müalicəsi və reabilitasiyası istiqamətində həyata keçirilən tədbirlər barədə ətraflı danışıb.

Nazir qeyd edib ki, Prezident İlham Əliyevin müvafiq sərəncamlarına əsasən Bakıda professor Gindes adına Respublika Uşaq və Yeniyetmələr üçün Vərəm və Tənəffüs Orqanlarının Xəstəlikləri Sanatoriyasının yeni binası inşa olunub. Sanatoriyada pasiyentlərin kompleks müalicəsi üçün zəruri tibbi və sosial reabilitasiya xidmətləri təşkil olunub, müasir tibbi yanaşmalar və profilaktik proqramlar tətbiq edilir.

Sonra müəssisənin müalicə və diaqnostika bölmələri, laboratoriya və reabilitasiya sahələri ilə tanışlıq olub. Bildirilib ki, sanatoriyada müasir tibbi avadanlıqlardan istifadə olunur, pasiyentlərin sağlamlığının bərpası və sosial adaptasiyası üçün kompleks tədbirlər həyata keçirilir.

ÜST-nin Baş direktoru Tedros Adhanom Ghebreyesus sanatoriyada yaradılmış şəraiti və uşaqların müalicəsi və reabilitasiyası istiqamətində görülən işləri yüksək qiymətləndirib. O, qlobal səviyyədə vərəmlə mübarizənin mühüm prioritetlərdən biri olduğunu qeyd edərək, bu sahədə ÜST ilə Azərbaycan arasında əməkdaşlığın əhəmiyyətini vurğulayıb.

Qonaqlar müəssisədə müalicə alan uşaqlarla görüşüb, onların müalicə və reabilitasiya şəraiti ilə yaxından tanış olublar.

Sonda ÜST-nin Baş direktoru sanatoriyanın kollektivi ilə səmimi görüş keçirib, onların fəaliyyəti ilə yaxından tanış olub və görülən işləri yüksək qiymətləndirərək gələcək fəaliyyətlərində uğurlar arzulayıb.