Yaşamaq və yaşatmaq naminə: donorluq mədəniyyətinin təşviqi davam edir

03 Aprel 2026

536

Səhiyyə Nazirliyi Orqan Donorluğu və Transplantasiyası üzrə Koordinasiya Mərkəzi (ODTKM) əhali arasında, xüsusilə gənclər auditoriyasında donorluq mədəniyyətinin formalaşdırılması məqsədilə maarifləndirmə tədbirlərini davam etdirir. Silsilə görüşlərin növbəti ünvanı Azərbaycan Dövlət Dəniz Akademiyası (ADDA) olub.

Azmedinfo.az xəbər verir ki, tədbiri giriş sözü ilə açan ADDA-nın tədrisin təşkili və idarəedilməsi üzrə prorektoru İradə Süleymanova orqan bağışlamanın humanitar əhəmiyyətini vurğulayaraq bildirib ki, donorluq ümidlə ümidsizlik arasında, donorla resipienti birləşdirən mənəvi bir körpüdür. Bu körpünün memarları isə məhz bu ali qərarı verən insanlardır.

ODTKM İdarə Heyətinin sədri Yeganə Abbasova çıxışında transplantasiya gözləyən dializ xəstələrinin çətin vəziyyətindən, köçürülməsi mümkün olan orqanlardan və bu sahədə mövcud qanunvericilikdən bəhs edib. O qeyd edib ki, orqan bağışlamaq ali bir qərar olsa da, hər kəs donor ola bilmir. Transplantasiyanın baş tutması üçün tibbi baxımdan mütləq şəkildə xəstəxanada beyin ölümü faktı təsdiqlənməlidir.

Mərkəz sədri transplantasiyanın sosial tərəflərinə də diqqət çəkərək bildirib: “Bu gün ölkəmizdə 4 mindən çox insan dializ cihazlarından asılı vəziyyətdə yaşayır və onların yeganə çıxış yolu orqan nəqlidir. Transplantasiya yalnız ağır xəstənin sağalması deyil, həm də bir ailənin yenidən bütövləşməsi deməkdir. Hazırda qanunvericilik bazamız və tibbi infrastrukturumuz böyrək, qaraciyər, ürək, ağciyər və digər həyati vacib orqanların köçürülməsinə tam imkan verir. Hər kəs bilməlidir ki, beyin ölümü geri dönməz bir prosesdir və bu vəziyyətdə olan şəxsin orqanları 8-dən çox insanın həyatını xilas edə bilər.”

Daha sonra ODTKM-nin həkim-koordinatoru Mehriban Əliyeva donorluq prosesinin texniki və tibbi tərəfləri barədə ümumi məlumat verib, prosesin şəffaflığı və təhlükəsizliyi məsələlərinə aydınlıq gətirib.

Tədbirin sonunda tələbələrin mövzu ilə bağlı çoxsaylı sualları mütəxəssislər tərəfindən ətraflı cavablandırılıb. Sualları ilə seçilən tələbələrə simvolik hədiyyələr təqdim olunub.