Tədris Cərrahiyyə Klinikasının həkimlərindən daha bir uğurlu ortopedik əməliyyat

10 Aprel 2026

212

Tədris Cərrahiyyə Klinikasının həkimlərindən daha bir uğurlu ortopedik əməliyyat

Azərbaycan Tibb Universitetinin (ATU) Tədris Cərrahiyyə Klinikasında anadangəlmə bud-çanaq oynağı displaziyası diaqnozu qoyulmuş xəstə üzərində mürəkkəb cərrahi əməliyyat uğurla icra olunub.

Azmedinfo.az xəbər verir ki, müdaxilə ATU-nun Travmatologiya və Ortopediya kafedrasının müdiri, professor Cəfər Nəsirli tərəfindən həyata keçirilib.

Professor Cəfər Nəsirlinin sözlərinə görə, xəstədə sirke kasasının (asetabulumun) displaziyası ilə yanaşı, bud başının avaskulyar nekrozu da aşkarlanıb. Mövcud vəziyyət nəzərə alınaraq, xəstəyə süni oynaq – endoprotez implantasiya edilib. Əməliyyatın əsas məqsədi xəstənin ağrılarını aradan qaldırmaq, oynağın funksional imkanlarını bərpa etmək və həyat keyfiyyətini yüksəltmək olub.

Bu tip cərrahi müdaxilələr adətən orta hesabla 30 dəqiqə davam edir. Əvvəllər daha çox yaşlı xəstələrdə tətbiq olunan bu əməliyyatlara son illərdə gənc yaş qruplarında da ehtiyac yaranır.

Qeyd olunub ki, digər iri cərrahi əməliyyatlar kimi, bu müdaxilənin də müəyyən riskləri mövcuddur. Xüsusilə tromboemboliya və infeksiya ehtimalları diqqət mərkəzində saxlanılır. Bu risklərin minimuma endirilməsi məqsədilə əməliyyatdan sonra antibiotik terapiyası tətbiq olunur, eyni zamanda xəstənin vəziyyəti həkim nəzarətində mütəmadi izlənir.