Qastroenterologiyada son illərin ən effektiv diaqnostik və müalicəvi üsullarından biri olan ERCP (endoskopik retroqrad xolangio-pankreatoqrafiya) öd yolları və mədəaltı vəzinin axar sistemində yaranan problemlərin aşkarlanması və aradan qaldırılmasında mühüm rol oynayır.

Azmedinfo.az xəbər verir ki, bu barədə qastroenteroloq, hepatoloq, invaziv endoskopist Dr. Aqil Ağakişiyev məlumat verib.

Onun sözlərinə görə, ERCP minimal invaziv endoskopik prosedur olmaqla ənənəvi endoskopiyadan fərqli olaraq yalnız baxışla kifayətlənmir, eyni zamanda müdaxilə imkanı da yaradır. Bu üsul vasitəsilə tıxanıqlıq və digər anomaliyalar olan nahiyələr vizual olaraq daha dəqiq qiymətləndirilir və birbaşa müalicə tədbirləri həyata keçirilir. Digər diaqnostik metodların kifayət qədər informasiya vermədiyi hallarda ERCP daha üstün nəticələr verir.

Ekspert qeyd edir ki, ERCP öd yollarının genişləndirilməsi, öd daşlarının çıxarılması, daralmış öd yollarının açıq saxlanılması üçün stent yerləşdirilməsi, xüsusi balon vasitəsilə daralmaların genişləndirilməsi və şübhəli hallarda biopsiya götürülməsi hallarında geniş tətbiq olunur. 

Dr. Aqil Ağakişiyevin sözlərinə görə, bu prosedurun əsas üstünlüklərindən biri onun açıq cərrahi əməliyyatlara ehtiyacı əhəmiyyətli dərəcədə azaltmasıdır. Minimal invaziv yanaşma sayəsində pasiyentlərdə bərpa müddəti daha qısa olur, ağırlaşma riski azalır və estetik baxımdan çapıq izi qalmır.

Mütəxəssis vurğulayır ki, düzgün seçilmiş hallarda ERCP həm diaqnostik, həm də müalicəvi baxımdan yüksək effektivliyi ilə müasir tibbin əvəzolunmaz prosedurlarından biridir.