Selektiv abort, yəni körpənin cinsiyyətinə görə hamiləliyin süni şəkildə sonlandırılması müasir cəmiyyətin ən ağrılı yaralarından biri olmaqla yanaşı, həm də ciddi tibbi və psixoloji fəsadlara yol açır.

Azmedinfo.az xəbər verir ki, həkimlərin bildiridiyinə görə, bu müdaxilə yalnız bioloji bir prosedur deyil, qadın orqanizmində infeksion fəsadlar, qanaxmalar və gələcəkdə sonsuzluq yarada biləcək ağır fiziki zədələr buraxan riskli bir prosesdir.

Fiziki ağrılardan daha dərini isə əməliyyatdan sonra qadının ruhunda yaranan sarsıntılar, uzunmüddətli depressiya və bitmək bilməyən ağır günahkarlıq hissidir.

Çox vaxt ailə təzyiqi ilə verilən bu qərar, əslində ailə institutunun təməllərini sarsıdır və cəmiyyətdəki demoqrafik balansı pozaraq gələcək nəsillər üçün ciddi sosial təhlükələr yaradır.

Hər bir övlad cinsindən asılı olmayaraq bir həyat, bir ümid deməkdir və bu canı həyatdan məhrum etmək həm ana sağlığına, həm də mənəviyyata vurulan geri dönülməz bir zərbədir. Bu səbəbdən də hər bir valideyn ani qərarların doğuracağı acı nəticələri dərindən düşünməli və övladının yaşamaq hüququnu hər şeydən üstün tutmalıdır.