Səhiyyə Nazirliyi Elmi-Tədqiqat Kardiologiya İnstitutu vətəndaşlara göstərilən tibbi xidmətlərin keyfiyyətinin yüksəldilməsi və əlçatanlığın təmin edilməsi istiqamətində fəaliyyətini genişləndirməkdə davam edir.

Azmedinfo.az xəbər verir ki, müasir tibbi avadanlıqlarla təchiz olunmuş institutda artıq ən mürəkkəb kardioloji prosedurlar, o cümlədən ürək ritm pozğunluqlarının müalicəsində tətbiq edilən ablasiya əməliyyatları, kardiostimulyatorların və implantasiya olunan kardioverter-defibrilyatorların (ICD) yerləşdirilməsi tam ödənişsiz əsaslarla həyata keçirilir.

Bununla yanaşı, ürək-damar xəstəliklərindən əziyyət çəkən şəxslər üçün həyati əhəmiyyət kəsb edən angioqrafiya müayinələri və invaziv kardiologiyanın son nailiyyətləri sayılan endovaskulyar müdaxilələr, balon angioplastika və stentləmə prosedurları da vətəndaşların istifadəsinə verilib.

Yüksək ixtisaslı mütəxəssis heyəti tərəfindən icra olunan bu xidmətlər ölkədə ürək-damar patologiyalarının effektiv müalicəsinə və ölüm riskinin azaldılmasına birbaşa töhfə verir. Vətəndaşlar heç bir əlavə ödəniş etmədən müasir standartlara cavab verən bu yüksək texnoloji tibbi yardımdan yararlana bilərlər.