Türkiyənin Səhiyyə Nazirliyi siqaret və digər tütün məmulatlarından istifadəni azaltmaq üçün teleserial və kino sənayesinin aparıcı istehsalçıları ilə bir araya gələcək və tütün əleyhinə mesajların əhatə dairəsini artırmaq üçün əməkdaşlıq edəcək.

Azmedinfo.az xəbər verir ki, Səhiyyənin İnkişafı Baş Direktoru Muhammed Atak verdiyi açıqlamada, Səhiyyə Nazirinin göstərişi ilə yeni dövrdə "Qoruyucu, İnkişaf edən və İstehsal edən Sağlamlıq Modeli" çərçivəsində işlərinin sürətləndirildiyini söyləyib.

Bu yeni dövrdə profilaktik səhiyyə xidmətlərini ön plana çıxarmaq istədiklərini vurğulayan Atak, tütünlə mübarizədə cəmiyyətin bütün paydaşlarının iştirakının vacibliyinə toxunub.

Siqaret və digər tütün məmulatları ilə effektiv mübarizə aparmaq üçün təkcə qanun və qaydalarla deyil, həm də ictimai şüurun artırılması yolu ilə hərəkət etmək lazım olduğunu bildirən Atak tütünlə mübarizədə cəmiyyətin bütün üzvlərini bu prosesin bir parçası etmək istədiklərini deyib:"Yalnız bu yolla uzunmüddətli perspektivdə uğur qazana bilərik".

Tütünlə mübarizədə medianın və sənət dünyasının rolunun əhəmiyyətinə diqqət çəkən Atak qeyd edib ki, serial və filmlərdə siqareti təşviq edən səhnələrin azaldılmasını, bunun əvəzinə tütün asılılığının zərərləri ilə bağlı maarifləndirici mesajların verilməsini gözləyirik.