Yeni Klinikada Almaniya standartlarına uygun tibbi təlimlərə başlanılıb

25 Aprel 2025

548

TƏBİB və Yeni Klinika ilə Almaniyanın nüfuzlu səhiyyə idarəetmə şəbəkələri olan “Falk Beratung” və “Sana Hospital Group” arasında imzalanmış əməkdaşlıq müqaviləsi çərçivəsində Yeni Klinikada tibbi personal üçün təlimlərə start verilib.

Azmedinfo.az xəbər verir ki, ilk təlim mərhələsində xəstələrə qulluq və tibb bacısı xidmətinin dəstəklənməsi modulu üzrə sessiyalar baş tutub. 12 həkim və 60 tibb bacısının cəlb olunduğu təlimdə Almaniyadan gəlmiş yüksəkixtisaslı mütəxəssislər tərəfindən nəzəri və praktiki biliklər təqdim olunub.

Təlim proqramı çərçivəsində “Sana” klinikasının Tibb bacısı akademiyasının direktoru Jörg Noll, klinikanın terapiya komandasının üzvü Reinhold Angerer, Xidmət komandasının üzvü İndat Tas, xəstə xidmətləri komandasının üzvü Marie Beinert sahə üzrə mühüm praktik mövzular üzrə təlimlər keçib, iştirakçıları pasiyent baxımında müasir yanaşmalar baxımından yeniliklərlə tanış ediblər.

Təlimlər zamanı iştirakçılar “Pasiyent yolu: ambulator (poliklinik) müayinədən keçərək planlı qəbul və cərrahi müdaxilə”, “Pasiyent yolu: ambulator (poliklinik) müayinədən keçərək planlı qəbul və konservativ müalicə”, həmçinin “Pasiyent yolu: təcili qəbul və sonrakı müalicə” kimi mühüm mövzular üzrə bilik və bacarıqlarını artırıblar.

Qeyd edək ki, təlimlərdən öncə TƏBİB-in Təlim və tədqiqatlar departamentinin Tibb müəssisələrində təlimlərin idarəolunması şöbəsinin əməkdaşları və “Sana” klinikasının ekspertlərinin iştirakı ilə Yeni Klinikada şöbələrə baxış keçirilib. Həmçinin onlar personalın iş rejimi ilə tanış olub və əməkdaşların təlim ehtiyaclarını öyrənib və bu ehtiyaclar əsasında müvafiq təlim modulları və metodikası hazırlanıb.

Məlumat üçün bildirək ki, bu kimi təlimlər tibbi xidmətlərin davamlı inkişafı və beynəlxalq standartlara uyğunlaşdırılması məqsədilə həyata keçirilir.