Amerikalı nevroloq Kimberli İdoko müsahibəsində hər bir insanın beyin sağlamlığını dəstəkləmək üçün real olaraq nələr edə biləcəyindən danışıb.

Azmedinfo.az "EatingWell" nəşrinə istinadən yazır ki, mütəxəssisin fikrincə, qazanılmalı olan əsas vərdişlərə daimi fiziki aktivlik, yuxu rejiminə riayət edilməsi və hər gün "koqnitiv sükut" anlarının yaradılması daxildir. Bütün ekspertlər keyfiyyətli yuxunu koqnitiv sağlamlığın ən mühüm amillərindən biri hesab edirlər. Bu məsələdə hər gün eyni vaxtda yatmaq və oyanmaq vərdişi köməyə çatır. Xüsusilə yuxudan əvvəl qadcetlərdən istifadəni məhdudlaşdırmaq olduqca faydalıdır, çünki ekranlardan yayılan mavi işıq və artıq yüklənmə yuxunu tənzimləyən hormonların ifrazında pozuntulara yol aça bilər.

Ümumi və xüsusilə mental sağlamlığın digər vacib komponenti isə müntəzəm fiziki aktivlikdir. Daimi yüklənmələr qan dövranını və beynin oksigenlə təchizatını dəstəkləməyə kömək edir, uzun müddət oturmaq isə əksinə, beyin funksiyalarına mənfi təsir göstərir. Beyin sağlamlığı üçün lazımi dərəcədə qiymətləndirilməyən amillərdən biri də "koqnitiv sükut" dövrləridir. İnsanın zaman-zaman özünü daimi informasiya axınından və bildirişlərdən təcrid etməsi zəruridir. Davamlı olaraq onlayn qalmaq beyni daim yüksək hazırlıq vəziyyətində olmağa məcbur edir. Həddindən artıq gərginlikdən beyin zəifləyir, bu da öz növbəsində emosional fona təsir edərək təşviş hissi yaradır, buna görə də mütləq fasilələr verilməlidir.