Anadangəlmə əl və ayaq qüsuru olan uşaq Tədris Cərrahiyyə Klinikasında uğurla əməliyyat olunub

29 Aprel 2026

106

Anadangəlmə əl və ayaq qüsuru olan uşaq Tədris Cərrahiyyə Klinikasında uğurla əməliyyat olunub

ATU-nun Tədris Cərrahiyyə Klinikasının uşaq cərrahiyyəsi şöbəsinin cərrahı, assistent Vüqar Məhəmmədov tərəfindən hər iki əlində sindaktiliya (barmaqların birləşik olması) diaqnozu qoyulan uşağın cərrahi müalicəsi icra olunub.

Azmedinfo.az xəbər verir ki, həkimin sözlərinə görə, sindaktiliya kifayət qədər tez-tez rast gəlinən anadangəlmə inkişaf qüsurlarından biridir. Pasiyentdə yalnız əllərdə deyil, ayaqlarda da əlavə barmaq və barmaqların birləşik olması müşahidə edilib ki, bu hal polisindaktiliya adlanır.

Cərrahi planlamaya əsasən, ilkin mərhələdə əllər üzərində əməliyyat həyata keçirilib. Əməliyyatdan sonra ilkin bərpa dövrü tamamlandıqdan təxminən 6 ay sonra ayaqlarda olan patologiyanın aradan qaldırılması üçün növbəti mərhələnin icrası nəzərdə tutulur.

Vüqar Məhəmmədov bildirib ki, bütün cərrahi müdaxilələrdə olduğu kimi, bu əməliyyatın da müəyyən riskləri mövcuddur. Bəzi hallarda dəri çatışmazlığı yarandıqda dəri köçürülməsi tətbiq oluna bilər. Lakin pasiyentdə daha yüngül forma – əsasən dəri tipli sindaktiliya müşahidə olunduğundan əməliyyatın uğurlu nəticələnməsi gözlənilir.

Həkim qeyd edib ki, bu tip hallarda uşaqların 1 yaşında müayinəyə gətirilməsi vacibdir. Əməliyyat üçün ən uyğun dövr adətən 12–14 ay aralığı hesab olunur. Bununla belə, son qərar patologiyanın növü və ağırlıq dərəcəsinə əsasən verilir.

Əməliyyatdan sonrakı dövrdə 4–6 həftə ərzində sarğı tətbiq edilir, daha sonra tikişlər açılır və reabilitasiya mərhələsinə başlanılır. Bu mərhələdə müalicəvi gimnastika və barmaqların hərəkətliliyini bərpa edən məşqlər xüsusi əhəmiyyət daşıyır. Çapıqlaşma və hərəkət məhdudluğunun qarşısını almaq məqsədilə bəzi hallarda uzunmüddətli əlavə müalicə də tövsiyə olunur.

Mütəxəssis onu da vurğulayıb ki, sindaktiliya bəzi hallarda genetik mənşəli ola bilər. Belə ki, pasiyentin ailə üzvlərindən birində də eyni patologiya müşahidə edilib.