Son illərdə mediada həkimlər, səhiyyə sistemi və xəstəxanalar haqqında yayılan neqativ və nifrət dolu paylaşımlar cəmiyyətin düşüncə mühitinə ciddi təsir göstərməkdə idi. Təəssüf ki, bir çox tibbi ağırlaşma dərhal və qəti şəkildə həkimlərin və ya səhiyyə sisteminin xətası kimi təqdim olunur, emosional və günahlandırıcı yanaşmalar üstünlük təşkil edirdi.

Bu cür düşüncə tərzinin acı nəticələri artıq özünü göstərdi. Milli Onkologiya Mərkəzində baş verən faciə bir vətəndaşımızın həyatını itirməsi və həkim Asif Nəsirlinin ağır yaralanması hamımız üçün ciddi bir xəbərdarlıq olmalıdır. Vəfat edən vətəndaşımıza rəhmət diləyir həkim həmkarımıza təcili şəfalar diləyirik.

Unutmamalıyıq ki, tibb mükəmməl deyil; hər müdaxilə risk daşıyır, hər nəticə isə bəzən gözlənildiyi kimi olmaya bilər. Bu reallığı çox dəqiq ifadə edən William Osler belə deyirdi: “Tibb qeyri-müəyyənliyin elmidir və ehtimalın sənətidir.”

Digər tərəfdən, informasiya məkanının gücü və məsuliyyəti də danılmazdır. Bunu media peşəkar media işçiləri daha dəqiq bilməli və diqqət etməlidir. Malcolm X-in məşhur fikrini xatırlamaq yerinə düşər: “Əgər diqqətli olmasanız, media sizi zalımı sevməyə və məzlumdan nifrət etməyə məcbur edə bilər.”

Nifrət, kin və aqressiya nə ədalət gətirir, nə də həqiqəti üzə çıxarır. Əksinə, bu duyğular cəmiyyəti daha dərin uçuruma sürükləyir və bu gün yaşanan kimi faciələrə zəmin yaradır.

Cəmiyyət olaraq daha məsuliyyətli olmalı, hadisələrə emosiyalarla deyil, anlayış və sağlam düşüncə ilə yanaşmağı öyrənməliyik. Həkimlər insan həyatını qorumaq üçün çalışan insanlardır, onların da təhlükəsizliyi qorunmalıdır.

Altay Əliyev

Azərbaycan Cərrahiyyə, Qastroenterologiya və Onkologiya Cəmiyyətinin sədri, onkoloq