Bəşəriyyət yaxın gələcəkdə xərçəngə tamamilə qalib gələ bilməyəcək, lakin fərdiləşdirilmiş vaksinlərin hazırlanması sayəsində onkoloji xəstəliklərdən ölüm hallarını çox güman ki, azalda biləcək.

Azmedinfo.az xəbər verir ki, bu barədə onkoloq Anton Saad "RİA Novosti"yə verdiyi müsahibədə bildirib.

"Söhbət bütün onkoloji xəstəliklərin tamamilə aradan qaldırılmasından gedirsə, yaxın gələcəkdə bu, qeyri-mümkündür. Xərçəng tək bir xəstəlik deyil, yüzlərlə genetik cəhətdən müxtəlif xəstəliklər toplusudur və hətta ən mükəmməl vaksinlərlə belə tam qələbə ehtimalı azdır", — deyə ekspert izah edib.

Bununla belə, o vurğulayıb ki, xərçəngin əksər formalarını xroniki və nəzarət oluna bilən vəziyyətə gətirmək mümkün olacaq.

Onkoloq əlavə edib ki, fərdiləşdirilmiş mRNT vaksinlərinin effektivliyinə dair artıq inandırıcı sübutlar əldə edilib, buna görə də gələcəkdə vaksinlər cərrahiyyə və immunoterapiyaya əlavə olaraq xərçəngin müalicə standartlarına daxil edilə bilər.