Üzgüçülük ürək sağlamlığını qaçışdan daha effektiv şəkildə möhkəmləndirə bilər.

Azmedinfo.az Lenta.ru-ya istinadən yazır ki, San-Paulu Federal Universitetinin tədqiqatçıları bu qənaətə gəliblər və işin nəticələrini Scientific Reports jurnalında dərc ediblər.

Heyvanlar üzərində aparılan eksperimentdə alimlər iki növ yükün, qaçış və üzgüçülüyün ürək-damar sisteminə təsirini müqayisə ediblər. Hər iki məşq variantı dözümlülüyü eyni dərəcədə yaxşılaşdırıb: oksigen istehlakı göstəricisi 5 faizdən çox artıb. Lakin yalnız üzgüçülük ürəyin özündə nəzərəçarpacaq dəyişikliklərə — ürək əzələsi kütləsinin artmasına və onun yığılma qabiliyyətinin yaxşılaşmasına səbəb olub.

Analizlər göstərib ki, üzgüçülük mikro-RNT-lərin — hüceyrələrin böyüməsini, damarların formalaşmasını və ürəyin zədələrdən qorunmasını tənzimləyən molekulların işinə daha güclü təsir göstərir. Müəlliflərin fikrincə, məhz bu mexanizmlər ürəyi daha güclü və yüklərə qarşı davamlı edir.

Tədqiqatçılar qeyd edirlər ki, hər iki fəallıq növü sağlamlıq üçün faydalıdır, lakin üzgüçülük, xüsusən də ürəyin bərpası ilə bağlı vəziyyətlərdə əlavə effekt verə bilər.