Mədəaltı vəzi qarın boşluğunun ən dərin nahiyəsində yerləşdiyi üçün adi USM və ya KT müayinələri bəzən bu orqandakı kiçik şişləri və ya kistaları tam dəqiqliyi ilə aşkar etməkdə çətinlik çəkə bilər.

Azmedinfo.az xəbər verir ki, qastroenteroloq, hepatoloq və invaziv endoskopist Dr. Aqil Ağakişiyev sözlərinə görə, məhz bu cür gizli qalan törəmələri görmək üçün Endoskopik Ultrasəs (EUS) müayinəsi hazırda tibb dünyasında ən dəqiq üsul hesab olunur.

Bu müasir metod adi müayinələrdə görünməyən kiçik törəmələri və öd yollarındakı mikroskopik daşları maksimum dəqiqliklə aşkar edərək diaqnostik xətaları minimuma endirir.

Eyni zamanda, EUS vasitəsilə heç bir cərrahi kəsik aparmadan, sadəcə ağız boşluğu yolu ilə şübhəli kütlələrdən iynə nümunəsi götürmək mümkündür. Müayinə zamanı şişin daxili divara nüfuz etmə dərəcəsi dəqiq müəyyən edildiyi üçün həkimlər əməliyyatın növünə, yəni kəsiksiz ESD/EMR və ya klassik cərrahiyyə metoduna dair ən doğru qərarı verə bilirlər. Mədəaltı vəzi kistalarının və şişlərinin diaqnostikasında "qızıl standart" sayılan bu prosedur xəstənin tam rahatlığını təmin edir. Bütün proses sedasiya, yəni yüngül yuxu altında icra olunduğu üçün pasiyent heç bir ağrı və ya narahatlıq hiss etmədən müayinə olunur.