Gülnaz Dadaşova: Məqsədimiz kardiologiya sahəsindəki ən son elmi yenilikləri regionlara daşımaq və tibbi əlçatanlığı artırmaqdır

05 May 2026

186

Naxçıvan şəhərində Azərbaycan Respublikası Səhiyyə Nazirliyi Elmi-Tədqiqat Kardiologiya İnstitutu və Naxçıvanın Səhiyyə Nazirliyinin birgə təşkilatçılığı ilə 4–5 may tarixlərində ilk dəfə “Naxçıvan Sağlamlıq Günləri” və “1-ci Naxçıvan Kardioloji Forumu” tədbirləri keçirilib.

Azmedinfo.az xəbər verir ki, tədbirin əsas məqsədi region əhalisinin sağlamlığının qorunması, tibbi xidmətlərin əlçatanlığının artırılması, profilaktik müayinələrin genişləndirilməsi, eləcə də səhiyyə sahəsində müasir elmi nailiyyətlərin tətbiqinin təşviq edilməsindən ibarət olub.

Layihə çərçivəsində 4 may tarixində vətəndaşlar üçün genişmiqyaslı profilaktik tibbi müayinələr aparılıb, eyni zamanda tibb işçilərinin peşə bilik və bacarıqlarının artırılması məqsədilə təlim kursları təşkil olunub.

Növbəti gün Naxçıvan Muxtar Respublika Xəstəxanasında “1-ci Naxçıvan Kardioloji Forumu” öz işinə başlayıb.

Əvvəlcə Forum iştirakçıları xalqımızın Ümummilli Lideri Heydər Əliyevin Naxçıvan şəhərinin baş meydanında əzəmətlə ucalan abidəsini ziyarət edib, önünə gül dəstələri düzərək əziz xatirəsini ehtiramla yad ediblər.

Forumda Naxçıvan Muxtar Respublikasının səhiyyə rəhbərliyi, dövlət qurumlarının nümayəndələri, ölkənin aparıcı kardioloqları və beynəlxalq ekspertlər iştirak ediblər.

Açılış mərasimində çıxış edən Naxçıvan Muxtar Respublikası səhiyyə nazirinin səlahiyyətlərini müvəqqəti icra edən Rəşadət Nabatov iştirakçıları salamlayaraq forumun işinə uğurlar arzulayıb.

Forumda çıxış edən Elmi-Tədqiqat Kardiologiya İnstitutunun direktoru Gülnaz Dadaşova qeyd edib ki, bu təşəbbüsü ilk dəfə olaraq Naxçıvanda genişmiqyaslı şəkildə həyata keçirməkdə məqsədimiz kardiologiya sahəsindəki ən son elmi yenilikləri regionlara daşımaq, tibbi xidmətin keyfiyyətini yüksəltməklə yanaşı, əhaliyə yerindəcə yüksəkixtisaslı diaqnostik dəstək göstərməkdir: "Hesab edirəm ki, bu formatda keçirilən tədbirlər həm yerli kadrların peşəkarlığının artırılmasına, həm də ürək-damar xəstəliklərinin erkən diaqnostikasına mühüm töhfə verəcəkdir."

Forum çərçivəsində ürək-damar xəstəliklərinin müasir diaqnostika və müalicə yanaşmaları müzakirə olunub, təqdimatlar edilib. Tədbir Səhiyyə Nazirliyi tərəfindən 15 DTT ilə akkreditasiya olunub.

Tədbirin gələcək illərdə də uğurla davam etdirilməsi və bölgədə tibbi xidmət keyfiyyətinin yüksəldilməsində rolu hədəflənir.