Səhiyyə Nazirliyi Elmi-Tədqiqat Mamalıq və Ginekologiya İnstitutu növbəti dəfə böyük bir tibbi uğura imza atıb.

Azmedinfo.az İnstitutun peşəkar həkim heyətinin möcüzəvi xilas hekayəsini izləyiciləri ilə paylaşır.

27 fevral 2026-cı il tarixində, hamiləliyin cəmi 28-ci həftəsində dünyaya göz açan əkiz körpələr, həyatın ən çətin sınağı ilə hələ ilk nəfəslərində qarşılaşıblar.

Dünyaya gələrkən çəkisi cəmi 1270 qram olan oğlan və cəmi 1000 qram olan qız körpə üçün yaşamaq ümidi həm ailəsi, həm də həkimlər üçün böyük bir məsuliyyətə çevrilib. Vaxtından əvvəl doğulmanın gətirdiyi kəskin fəsadlarlara - kritik dərəcədə aşağı bədən çəkisi, tənəffüs çatışmazlığı, ağır infeksion risklər, sarılıq və anemiya ilə üz-üzə qalan balacalar, həyatda qalmaq üçün uzun müddət intensiv terapiya şöbəsində ASV və CPAP cihazlarının dəstəyi ilə mübarizə aparıblar.

Bu çətin və həssas müddətdə mama-ginekoloq Könül Qarayeva və neonatoloq Günel Xəlilovanın yüksək peşəkarlığı, diqqəti və müasir tibbi yanaşması möcüzəni reallığa çevirib. Həkimlərimizin fədakar əməyi sayəsində kiçik qəhrəmanlar bütün riskləri geridə qoyaraq sağlamlıqlarına qovuşublar.

Azçəkili doğulan hər bir körpə üçün hər yeni gün böyük bir zəfər, hər nəfəs isə gələcəyə boylanan sönməz bir ümiddir. Düzgün seçilmiş tibbi strategiya və sonsuz qayğı ilə ən zəif görünən həyat işığı belə böyük bir parlaqlığa çevrilə bilər.