8 May – Beynəlxalq Talassemiya Günüdür - azmedinfo.az - Azərbaycan Tibbi İnformasiya və Səhiyyə Portalı

8 May – Beynəlxalq Talassemiya Günüdür

08 May 2026

Talassemiya, valideynlərdən uşaqlara genetik yolla keçən, qan tərkibindəki hemoqlobinin normal sintezinin pozulması ilə nəticələnən ağır bir qan xəstəliyidir. Bu xəstəlik zamanı qırmızı qan hüceyrələri (eritrositlər) sürətlə parçalanır ki, bu da orqanizmdə xroniki qanazlığına (anemiya) və daxili orqanların oksigen aclığına səbəb olur.

Azmedinfo.az xəbər verir ki, mütəxəssislərin bildiridiyinə görə,xəstəlik adətən uşağın ilk yaşlarından etibarən özünü büruzə verməyə başlayır.

Əsas klinik əlamətlər

İnkişafın ləngiməsi: Həm fiziki, həm də zehni inkişafda yaşıdlarından geri qalma.

Skelet dəyişiklikləri: Üz sümüklərinin quruluşunda, xüsusən alın və yanaq sümüklərində qabarmalar (kvadrat kəllə, "monqoloid" siması).

Daxili orqanların böyüməsi: Qaraciyər və dalağın həddindən artıq böyüməsi nəticəsində qarın nahiyəsinin qabarması.

Zəiflik və İnfeksiyalar: İmmunitetin aşağı olması səbəbindən tez-tez yoluxucu xəstəliklərə tutulma və xroniki yorğunluq.

Talassemiya müalicəsi uzunmüddətli, baha başa gələn və mürəkkəb bir prosesdir (mütəmadi qan köçürmələri, sümük iliyi nəqli və s.). Lakin bu xəstəliyin profilaktikası mümkündür:

Nikahdan öncə müayinə: Gənclərin nikaha daxil olmazdan əvvəl sadə bir qan analizi ilə talassemiya daşıyıcısı olub-olmadıqlarını yoxlatması mütləqdir. Unutmayın ki, daşıyıcılıq xəstəlik deyil, lakin iki daşıyıcı nikah bağladıqda xəstə uşağın doğulma riski 25% təşkil edir.

Genetik məsləhət: Əgər ailədə talassemiya tarixi varsa, hamiləlik planlaşdırılan zaman mütəxəssis nəzarəti vacibdir.

Prenatal diaqnostika: Hamiləliyin erkən dövrlərində dölün genetik analizi xəstəliyin qarşısını almağa imkan verir.

Sağlam gələcəyin təməli məsuliyyətli və məlumatlı seçimdən keçir. Özünüzü və gələcək övladlarınızı bu ağır yükdən qorumaq üçün vaxtında müayinə olun.