"German Diabetes Center" alimləri tərəfindən aparılan araşdırma göstərib ki, ikinci tip diabet yeni aşkarlanan pasiyentlərdə artıq erkən mərhələdə qlükaqon hormonunun səviyyəsi yüksəlir.

Azmedinfo.az "Diabetes Care" jurnalında dərc olunan tədqiqata diqqət çəkib.

İkinci tip diabetlə bağlı araşdırmalar adətən qanda şəkərin səviyyəsini tənzimləyən insulin hormonuna yönəlir. Lakin digər mühüm hormon olan qlükaqon da mövcuddur. Bu hormon insulinə əks təsir göstərərək qaraciyəri qlükozanı qana buraxmağa məcbur edir. Normal halda insulin və qlükaqon arasında tarazlıq qorunur. Ancaq ikinci tip diabet bu mexanizmi pozur.

Mütəxəssislər yeni aşkarlanmış ikinci tip diabeti olan 50 yetkin şəxsin və qlükoza mübadiləsində pozğunluğu olmayan eyni sayda insanın məlumatlarını təhlil ediblər. Məlum olub ki, yeməkdən sonra diabetli iştirakçılarda qlükaqonun səviyyəsi sağlam insanlarla müqayisədə 75 faiz daha yüksək olub.

Ən diqqətçəkən məqam isə hormon səviyyəsinin artmasının əvvəllər düşünüldüyü kimi insulinə qarşı müqavimətlə deyil, əsasən qaraciyərin piylənməsi ilə əlaqəli olmasıdır.

Tədqiqatçılar hesab edirlər ki, qaraciyər hüceyrələrində toplanan piy toxuması orqanın qlükaqona həssaslığını azalda bilər. Nəticədə isə orqanizm daha çox qlükaqon istehsal etməyə başlayır. Mütəxəssislər bu vəziyyəti “qaraciyərin qlükaqona rezistentliyi” adlandırırlar.