Optik eynəklər xəstəyə mütləq şəkildə mütəxəssis tərəfindən təyin olunmalıdır, çünki keyfiyyətsiz və yanlış seçilmiş eynək istifadəsi gözdə geri dönülməz problemlərin yaranmasına səbəb ola bilər.

Azmedinfo.az xəbər verir ki, ekspertlərin araşdırmalarından göründüyü kimi, bəzən insanlar optik eynək seçimində həkimlə məsləhətləşmək əvəzinə, sadəcə satış məntəqələrindən görünüşcə bəyəndikləri hazır eynəkləri almağa üstünlük verirlər. Lakin bu cür hazır eynəklərdə hər iki şüşənin dərəcəsi eyni olur ki, bu da hər kəs üçün uyğun deyil. Əgər şəxsdə gözlərin görmə zəifliyi dərəcələri bir-birindən fərqlidirsə, eyni dərəcəli eynəklərdən istifadə görmə zəifliyinin daha da artmasına, həmçinin xroniki göz və baş ağrılarına yol açır. Bir sözlə, optik eynək seçimində verilmiş özbaşına qərar sağlamlığa fayda vermək əvəzinə, ona mənfi təsir göstərir.

Bu səbəbdən eynək alarkən məhsulun keyfiyyət sənədinin olması olduqca məqsədəuyğundur. Həmin sənədlərdə şüşənin materialı və eynəyin gözləri ultrabənövşəyi şüalardan nə dərəcədə qoruması haqqında dəqiq məlumatlar əks olunur. Seçim zamanı eynəyin çəkisinə və rənginə də xüsusi fikir verilməlidir. Yüngül çəkili eynəklər həm burun sümüklərinə, həm də qulaq nahiyəsinə daha az təzyiq edərək rahat istifadəni təmin edir. Eyni zamanda, istifadəni asanlaşdırmaq üçün uzaqdan görmə eynəklərinin çərçivəsinin daha böyük, yaxından görmə eynəklərinin isə daha ensiz olması tövsiyə edilir.

Nəzərə almaq lazımdır ki, keyfiyyətsiz eynəklər gözdə quruluğa, sulanmaya və hətta kataraktaya səbəb ola bilər. Xüsusilə eynəyin şüşəsi həddindən artıq tünd olduqda, bu bəbəyin genəlməsinə, büllurun bulanmasına və nəticədə görmə qabiliyyətinin kəskin zəifləməsinə şərait yaradır. Odur ki, göz sağlamlığını qorumaq üçün eynək təyinatı yalnız peşəkar oftalmoloqlar tərəfindən həyata keçirilməlidir.