Ginekoloq-cərrah əkiz hamiləliklərdə yaranan təhlükələrdən danışdı

15 May 2026

474

Ginekoloq-cərrah əkiz hamiləliklərdə yaranan təhlükələrdən danışdı

ATU-nun I mamalıq-ginekologiya kafedrasının mama-ginekoloqu, Tədris Cərrahiyyə Klinikasının ginekoloq-cərrahı Səidə Vəliyeva əkiz hamiləliklərin yüksək riskli hamiləliklər sırasına aid olduğunu bildirib.

Azmedinfo.az xəbər verir ki, həkimin sözlərinə görə, bir döllü hamiləliklə müqayisədə əkiz hamiləliklərdə ağırlaşmalara daha tez-tez rast gəlinir.

Mütəxəssis qeyd edib ki, belə hallarda ağır toksikoz, ağır gedişli preeklampsiya, erkən və gec düşük, vaxtından əvvəl doğuş, döllərin az və ya ekstremal az çəkidə doğulması, anatomik anomaliyalar, fetofetal transfuziya sindromu, döllərin bətndaxili inkişaf ləngiməsi, neonatal və yeni doğulan ölümü kimi ciddi problemlər yarana bilər. Buna görə də əkiz hamiləliklər xüsusi diqqət və ciddi nəzarət tələb edir.

Həkim vurğulayıb ki, əkiz hamilə qadınlar həkim müayinəsinə daha tez-tez gəlməli, rutin yoxlanışlarla yanaşı əlavə müayinələrdən də keçməlidirlər. Məqsəd ana və döllərdə yarana biləcək ağırlaşmaların qarşısını vaxtında almaqdır. Ağırlaşma aşkarlanarsa, hamilə patologiyalar şöbəsinə yerləşdirilərək nəzarətdə saxlanılmalıdır.

Səidə Vəliyevanın sözlərinə görə, hazırda nəzarətdə olan pasiyentdə erkən həftələrdə düşük təhlükəsi müşahidə olunub. Hamiləliyin 28-ci həftəsindən etibarən uşaqlıq boynunda qısalma qeydə alınıb, 30-cu həftədə isə uşaqlıq boynunun uzunluğu 9 mm olub. Pasiyent Tədris Cərrahiyyə Klinikasının patologiyalar şöbəsinə yerləşdirilərək müvafiq müayinə, qulluq və müalicə ilə təmin edilib. Hazırda hamiləlik 35 həftə 3 günlükdür. Ana və hər iki dölün vəziyyəti qənaətbəxşdir. Həkim bildirib ki, əkizlər bixorionik-biamniotikdir, yəni hər iki dölün ayrıca cift və su kisəsi mövcuddur.

Həkim qeyd edib ki, əkiz hamiləliklərdə mütəmadi tibbi nəzarət ana və körpələrin sağlamlığının qorunmasında mühüm rol oynayır. Vaxtında aparılan müayinə və müalicə sayəsində bir çox ağırlaşmaların qarşısını almaq mümkündür.