Azərbaycan Tibb Universitetinin Bioloji kimya kafedrasında müasir biokimya və molekulyar biologiyanın aktual istiqamətlərini əhatə edən yeni elmi nəşrlərin təqdimatı keçirilib. Yeni kitablar həm tədris prosesinin zənginləşdirilməsi, həm də elmi tədqiqatların dərinləşdirilməsi baxımından mühüm əhəmiyyət kəsb edir.

Azmedinfo.az xəbər verir ki, təqdim olunan nəşrlər sırasında Gülnarə Əzizova, Nərmin Bayramova və Fərəh Məmmədovanın həmmüəllifi olduqları “Apoptoz və hüceyrə zədələnmələrinin biokimyəvi mexanizmləri” adlı monoqrafiya xüsusi yer tutur. Kitab hüceyrə ölümünün molekulyar əsaslarını, patoloji proseslərdə apoptozun rolunu və hüceyrə zədələnmələrinin biokimyəvi mexanizmlərini geniş elmi izahla təqdim edir.

Eyni zamanda Səbinə Quliyevanın müəllifi olduğu “Enzimologiyanın müasir aspektləri” kitabı ferment sistemlərinin funksional xüsusiyyətlərini, onların metabolik proseslərdə rolunu və müasir biotexnologiyada tətbiq imkanlarını əhatə edir. Nəşr enzimologiya sahəsində son elmi yenilikləri sistemləşdirərək tələbə və tədqiqatçılar üçün mühüm metodoloji baza yaradır.

Gülnarə Daşdəmirova tərəfindən hazırlanan “Membranologiya və hüceyrələrarası əlaqə” adlı əsər isə hüceyrə membranlarının quruluşu, funksiyaları və hüceyrələrarası siqnal ötürülməsi mexanizmlərini ətraflı şəkildə izah edir. Kitab müasir hüceyrə biologiyasının əsas problemlərinə elmi yanaşma təqdim etməsi ilə seçilir.

Kafedrada təqdim olunan bu nəşrlər biologiya, tibb və biokimya sahəsində təhsil alan tələbələr, magistrantlar, doktorantlar və elmi tədqiqatçılar üçün etibarlı və fundamental mənbə kimi dəyərləndirilir. Müəlliflər bildirirlər ki, məqsəd müasir elmi biliklərin sistemləşdirilməsi və gənc tədqiqatçıların beynəlxalq səviyyəli elmi ədəbiyyata çıxış imkanlarının genişləndirilməsidir.