Anesteziya təhlükəlidirmi? – Mütəxəssis cəmiyyətin qorxularına aydınlıq gətirib

18 May 2026

474

Anesteziya təhlükəlidirmi? – Mütəxəssis cəmiyyətin qorxularına aydınlıq gətirib

Tədris Cərrahiyyə Klinikasının anestezioloqu Famil Mustafa anesteziya ilə bağlı cəmiyyətdə formalaşan qorxu və narahatlıqlara münasibət bildirib, həmçinin anesteziya növləri və onların tətbiqi barədə məlumat verib.

Azmedinfo.az xəbər verir ki, mütəxəssisin sözlərinə görə, cəmiyyətdə anesteziyaya qarşı psixoloji qorxu və narahatlıq halları mövcuddur. Bu isə əsasən yanlış məlumatlar və xəbərlərlə əlaqələndirilir.

Həkim bildirib ki, müasir tibbdə istifadə olunan anesteziya preparatları və avadanlıqlar sayəsində əməliyyatların maksimum təhlükəsiz şəkildə aparılması mümkündür. Onun sözlərinə görə, anesteziya digər tibbi prosedurlar kimi müəyyən risklər daşısa da, bu risklər ciddi nəzarət altında minimuma endirilir.

Anesteziyanın növü əməliyyatın xarakterinə, xəstənin yaşı, ümumi sağlamlıq vəziyyəti və digər tibbi göstəricilərə əsasən fərdi şəkildə seçilir. Lokal anesteziya daha kiçik müdaxilələrdə, ümumi anesteziya isə daha geniş və mürəkkəb əməliyyatlarda tətbiq olunur.

Onun sözlərinə görə, hər bir pasiyent üçün dərman dozası və preparat seçimi fərdi yanaşma ilə həyata keçirilir və bu proses ciddi tibbi protokollara əsaslanır.

Həkim həmçinin vurğulayıb ki, “narkozdan ölüm” kimi ifadələr elmi baxımdan düzgün deyil. Belə hallar yalnız ciddi tibbi vəziyyətlərdə və ya protokollara əməl olunmadıqda yarana bilər. Müasir praktikada anesteziya nəzarətli və təhlükəsiz şəkildə icra olunur.

Sonda qeyd olunub ki, anesteziya zamanı pasiyentin tam təhlükəsizliyi təmin edilir və bütün əməliyyatlar peşəkar nəzarət altında həyata keçirilir.