Süni intellektin insan beyninə təsirləri ilə bağlı Massaçusets Texnologiya İnstitutunun (MIT) alimləri tərəfindən araşdırma aparılıb.

Azmedinfo.az "The Harvard Gaezete"nin məlumatına istinadən yazır ki, tədqiqat əsasən, esse yazarkən ChatGPT-dən istifadə edən şəxslər həm neyroloji, həm dil, həm də davranış səviyyəsində süni intellektsiz yazan insanlarla müqayisədə daha zəif nəticələr göstəriblər.

Tapşırıq tamamlandıqdan cəmi bir neçə dəqiqə sonra böyük dil modelindən (LLM) istifadə edən iştirakçılar yazdıqları mətnin məzmununu xatırlamaqda çətinlik çəkiblər. Onlar daha sonra süni intellektin köməyi olmadan esse yazmaq tapşırığında da digər iştirakçılardan geri qalıblar.

Alimlər bildirirlər ki, qısamüddətli düşünmə problemlərindən daha ciddi təhlükə zaman keçdikcə insanların dərin və tənqidi düşünmə qabiliyyətlərini itirməsidir.

MIT-in tədqiqatçısı və araşdırma müəlliflərindən biri Nataliya Kosmyna deyir: “Esse yazmaq kimi tapşırıqları yerinə yetirərkən, hətta onu vacib hesab etməsəniz belə, siz özünüzü mühüm məlumatları seçməyə, arqument qurmağa və düşüncə zəncirini sistemli şəkildə inkişaf etdirməyə öyrədirsiniz. Bütün bu bacarıqlar təcrübə ilə güclənir.”

Onun sözlərinə görə, əgər insan bütün bu prosesi böyük dil modelinin öhdəsinə buraxırsa, zamanla həmin qabiliyyətləri itirməyə başlayır.