Azərbaycan Respublikası Səhiyyə Nazirliyi işğaldan azad olunmuş ərazilərdə “Böyük Qayıdış” Proqramı çərçivəsində sağlam həyat tərzinin təşviqi məqsədilə növbəti humanitar aksiyaya start verir.

Azmedinfo.az xəbər verir ki, proqram çərçivəsində nazirliyin K.Y.Fərəcova adına Elmi-Tədqiqat Pediatriya İnstitutunun ixtisaslı həkim heyəti Xankəndi şəhərinə səfər edərək, buradakı balaca sakinlər üçün genişmiqyaslı tibbi müayinələr təşkil edəcək.

1 iyun – Uşaqların Beynəlxalq Müdafiəsi Gününə həsr olunan bu humanitar tədbirin əsas məqsədi Xankəndi şəhərində məskunlaşan azyaşlıların sağlamlığının etibarlı şəkildə qorunmasıdır. Aksiyada uşaqlar arasında müxtəlif xəstəliklərin erkən diaqnostikası və profilaktikası həyata keçiriləcək, eyni zamanda valideynlər yüksək ixtisaslı pediatrların peşəkar məsləhətləri ilə təmin olunacaqlar.

"Uşaqlar bizim gələcəyimizdir!" şüarı altında reallaşacaq bu xeyirxah layihədə bütün Xankəndi sakinləri fəal iştirak etməyə dəvət olunur. Valideynlər övladlarının sağlamlığı naminə yaradılan bu dövlət qayğısından və geniş tibbi imkanlardan tam ödənişsiz şəkildə yararlana bilərlər.