Anevrizma xəbərdarlığına rəğmən nənə nəvəsinə donor oldu

22 May 2026

728

Anevrizma xəbərdarlığına rəğmən nənə nəvəsinə donor oldu

Yeniyetmə Vüqar Qiyasovun bel və baş ağrılarından sonra həkimlərin müayinələri nəticəsində onun 5-ci dərəcəli böyrək çatışmazlığından əziyyət çəkdiyi müəyyən edilib. Xəstə bir müddət dializ alıb və həkimlər böyrək nəqlini vacib biliblər.

Azmedinfo.az Orqan Donorluğu və Transplantasiyası üzrə Koordinasiya Mərkəzinin məlumatına istinadən yazır ki, analizlər nəticəsində 16 yaşlı Vüqara donor kimi yalnız nənəsi Şahnaz xanım uyğun gəldi. O heç tərəddüd etmədən nəvəsi üçün donor olmağa razılaşdı.

Əməliyyat zamanı maraqlı və tibbi baxımdan spesifik bir vəziyyətlə qarşılaşıldı. Transplantoloq-cərrah Tariyel Nadirovun sözlərinə görə, əməliyyatdan əvvəl donor böyrəyində damar anevrizması aşkarlandı. Bu halda böyrək köçürüldükdən sonra həmin damar yırtıla bilərdi, bu da həm resipiyentin (nəvənin) həyatı üçün risk yaradar, həm də köçürülən orqanın itirilməsinə gətirib çıxarardı. Lakin fərqli bir cərrahi yanaşma tətbiq olundu. Həkimlər xüsusi cərrahi müdaxilə ilə anevrizmanı aradan qaldıraraq damarı bərpa etdilər və daha sonra böyrək uğurla Vüqara köçürüldü.

Hazırda əməliyyatdan xeyli müddət keçib. Həm nənə, həm də nəvə mütəmadi kontrollardan keçir və hər ikisinin vəziyyəti stabildir.

Ailə bu çətin yolda onlara dəstək olan hər kəsə minnətdardır: “Əvvəlcə Səhiyyə Nazirliyinin Orqan Donorluğu və Transplantasiyası üzrə Koordinasiya Mərkəzində qeydiyyata düşdük. Oradakı kollektivin isti münasibətini və operativ koordinasiyanı unuda bilmərəm. Peşəkar həkim heyəti də əməliyyatı uğurla icra etdi.”

Transplantasiya insanlara sağlamlığını qaytaran əsl tibbi möcüzədir. Azərbaycan həkimləri bu möcüzəni reallığa çevirərək insanlara sağlamlıq və sevinc bəxş edirlər.