Vətən müharibəsi qazisinin mərhələli cərrahi əməliyyatı uğurla icra olunub

24 May 2026

320

Vətən müharibəsi qazisinin mərhələli cərrahi əməliyyatı uğurla icra olunub

Tədris Cərrahiyyə Klinikasında Vətən müharibəsi qazisinin kompleks cərrahi müalicəsi icra olunur.

Azmedinfo.az xəbər verir ki, Azərbaycan Tibb Universitetinin I cərrahi xəstəliklər kafedrasının assistenti, Klinikanın Transplantologiya şöbəsinin müdiri, Anar Namazovun sözlərinə görə, 29 yaşlı pasiyent 44 günlük Vətən müharibəsi zamanı ağır vəziyyətdə tibb müəssisəsinə gətirilib. Xəstəyə ön xətt şəraitində ileostoma qoyulub.

Klinikaya daxil olarkən pasiyentdə bağırsaq keçməzliyi müşahidə olunub və ilkin mərhələdə ileostomanın yerinin dəyişdirilməsi – sağ tərəfə köçürülməsi icra edilib. Əməliyyatdan sonra xəstə iki ay müddətində stoma ilə normal həyatına davam edib.

Daha sonra təkrar rekonstruktiv əməliyyat aparılaraq stoma ləğv olunub. Hazırda isə pasiyentdə qarın ön divarının böyük, geniş ventral yırtığı (hernia) aşkarlanıb.

Həkimin sözlərinə görə, xəstədə həmçinin öd daşı xəstəliyi də müşahidə olunduğuna görə, eyni vaxtda kompleks cərrahi müdaxilə – öd kisəsinin çıxarılması (xolesistektomiya) və qarın ön divarının rekonstruksiyası həyata keçirilir. Əməliyyat zamanı transversus abdominis əzələsinin ayrılması (TAR – abdominal divar rekonstruksiyası) metodu tətbiq olunur.

A.Namazov qeyd edib ki, bu tip mürəkkəb rekonstruktiv əməliyyatlar yüksək cərrahi təcrübə və multidissiplinar yanaşma tələb edir.