Hər il dünyada Ümumdünya Qalxanabənzər Vəzi Günü qeyd olunur. Bu günün keçirilməsində əsas məqsəd qalxanabənzər vəzin xəstəlikləri barədə ictimai məlumatlılığı artırmaq, erkən diaqnostikanın və profilaktikanın əhəmiyyətini diqqətə çatdırmaqdır.

Azmedinfo.az xəbər verir ki, mütəxəssislərin bilddiyinə görə, qalxanabənzər vəzi orqanizmin enerji balansının tənzimlənməsində, maddələr mübadiləsində, ürək-damar sistemi, sinir sistemi və hormonal tarazlığın qorunmasında mühüm rol oynayır. Bu vəzdə yaranan problemlər halsızlıq, çəki dəyişiklikləri, ürək ritm pozğunluqları, stress, yaddaş zəifləməsi və digər sağlamlıq problemləri ilə özünü göstərə bilər.

Həkimlərin sözlərinə görə, vaxtında aparılan müayinələr və düzgün diaqnoz bir çox ağırlaşmaların qarşısını almağa imkan verir. Xüsusilə risk qrupuna daxil olan şəxslərə mütəmadi endokrinoloji müayinələrdən keçmək tövsiyə olunur.

Mütəxəssislər vətəndaşları öz sağlamlıqlarına diqqətlə yanaşmağa, profilaktik müayinələri gecikdirməməyə çağırırlar. Sağlam həyat tərzi, düzgün qidalanma və erkən diaqnostika qalxanabənzər vəzi xəstəliklərinin qarşısının alınmasında mühüm əhəmiyyət daşıyır.