1 İyun – Uşaqların Beynəlxalq Müdafiəsi Günü bütün dünyada uşaqların hüquqlarının qorunmasına, onların rifahı və sağlamlığına diqqətin artırılmasına həsr olunub. Bu əlamətdar gün bir daha xatırladır ki, hər bir uşağın sağlam, təhlükəsiz və qayğıkeş mühitdə böyümək hüququ var.

Azmedinfo.az xəbər verir ki, mütəxəssislərin fikrincə, uşaqların sağlam gələcəyi ailədə formalaşan düzgün vərdişlərdən başlayır. Valideynlərin gündəlik diqqəti və qayğısı uşaqların həm fiziki, həm də psixoloji inkişafında mühüm rol oynayır.

Pediatrlar valideynlərə ilk növbədə övladlarının qidalanmasına diqqət yetirməyi tövsiyə edirlər. Uşaqların rasionunda təbii və faydalı qidaların üstünlük təşkil etməsi onların immun sisteminin möhkəmlənməsinə kömək edir. Bununla yanaşı, hər gün açıq havada gəzmək və fiziki aktivlik uşaqların sağlam böyüməsinin vacib şərtlərindəndir.

Mütəxəssislər peyvəndlərin vaxtında aparılmasının da xüsusi əhəmiyyət daşıdığını bildirirlər. Peyvəndlər bir sıra təhlükəli xəstəliklərə qarşı etibarlı müdafiə vasitəsi olaraq uşaqların sağlamlığının qorunmasına xidmət edir.

Müasir dövrdə uşaqların uzun müddət telefon, planşet və kompüter qarşısında vaxt keçirməsi narahatlıq doğuran məsələlərdən biridir. Həkimlər ekran asılılığının qarşısının alınması, uşaqların asudə vaxtlarının daha çox hərəkətli oyunlara və sosial fəaliyyətlərə yönəldilməsini vacib hesab edirlər.

Uşaqların sağlamlığında emosional vəziyyət də mühüm yer tutur. Ailə daxilində sevgi, diqqət və anlayış mühiti uşağın özünəinamlı, xoşbəxt və sağlam şəxsiyyət kimi formalaşmasına kömək edir.

1 İyun münasibətilə valideynlərə bir daha xatırlatmaq istərdik ki, uşaqların sağlamlığına göstərilən hər bir qayğı onların gələcəyinə verilən ən dəyərli töhfədir. Sağlam uşaqlar sağlam ailənin, sağlam ailələr isə güclü cəmiyyətin təməlini təşkil edir.