“Ümumilikdə uşağa hər əsas qida qəbulu zamanı – səhər yeməyi, nahar və şam yeməyində 1–2 orta ölçülü tikə çörək vermək olar. Çörək ayrıca və ya az yağlı, daha yaxşısı zülal tərkibli məhsullarla hazırlanmış sendviç şəklində təqdim edilə bilər”, – deyə həkim məsləhət görür.

Azmedinfo.az "Arqumentı i faktı! nəşrinə istindaən yazır ki, həkimin sözlərinə görə, çörəklə birlikdə bir dilim pendir, qaynadılmış ət və ya quş əti vermək məqsədəuyğundur. Zərurət yarandıqda çox az yağlı bişmiş kolbasadan da istifadə etmək olar. Lakin pendir və kolbasanın eyni sendviçdə birləşdirilməsi tövsiyə edilmir. Bunun əvəzində kərə yağı və pendirlə hazırlanmış çörək uşaqlar üçün məqbul seçim hesab olunur.

Əgər uşaq şirin dadlara üstünlük verirsə, ona az şəkərli cem və ya mürəbbə ilə hazırlanmış sendviç təklif etmək mümkündür. Ancaq bu cür məhsulların miqdarı məhdudlaşdırılmalı, gündə bir sendviçdən artıq verilməməlidir. Pendirli isti sendviçlərə də icazə verilsə də, mayonez, ketçup və digər souslarla hazırlanmış çörək məhsulları sağlam qidalanma prinsiplərinə uyğun hesab edilmir.

Pediatr vurğulayır ki, sendviçlər ayrıca qəlyanaltı kimi deyil, əsas yeməklərin tərkib hissəsi kimi qəbul edilməlidir. Həmçinin onları səhər yeməyinin və ya ara qidalanmanın tam əvəzedicisi kimi istifadə etmək düzgün deyil. Ara qidalanma üçün meyvə, tərəvəz və müxtəlif taxıl çörəkcikləri daha faydalı seçimlər sayılır.

Qaynadılmış və ya hisə verilmiş kolbasa, həmçinin hisə verilmiş və duzlu balıqla hazırlanan sendviçlər gündəlik qidalanma üçün uyğun deyil. Bu cür qidalar daha çox bayram və xüsusi günlər üçün nəzərdə tutulmalı, ayda bir-iki dəfədən artıq verilməməlidir. Əksinə, pendirli, cemli və ya kərə yağlı sendviçlər uşağın gündəlik rasionunda yer ala bilər.

Qida mütəxəssisləri uşaqlar üçün çörək seçərkən etiketə xüsusi diqqət yetirməyi tövsiyə edirlər. Bildirilir ki, məhsulun tərkibində konservantlar, emulqatorlar və dadı yaxşılaşdıran digər əlavə maddələr olmamalıdır. Ən ideal seçim isə tərkibi sadə olan məhsullardır: un, su, duz, maya və ya xəmir mayası.

Mütəxəssislərin fikrincə, lif baxımından ən zəngin çörəklər arasında çovdar çörəyi və tam taxıllı çörəklər xüsusi yer tutur.

Bu barədə Ruysiyanın Qida Sənayesi Elmi-Tədqiqat İnstitutunun aparıcı elmi əməkdaşı və direktor müavini Olesya Savkina məlumat verərək bildirib ki, bu növ məhsullar uşaqların qidalanması üçün daha faydalıdır.

Onun sözlərinə görə, buğda çörəyində zülal miqdarı daha yüksək olsa da, çovdar çörəyi daha geniş spektrli faydalı qida komponentlərinə malikdir. Məsələn, üç dilim çovdar çörəyində təkcə B qrup vitaminlərinin gündəlik normasına yaxın miqdar deyil, həm də bir almadan daha çox dəmir elementi mövcuddur.