Azərbaycan Tibb Universitetinin Tədris Cərrahiyyə Klinikasına kəskin daşlı xolesistit diaqnozu ilə müraciət edən 1984-cü il təvəllüdlü pasiyent uğurla əməliyyat edilib.

Azmedinfo.az xəbər verir ki, aparılan müayinələrdən sonra xəstəyə laparoskopik xolesistektomiya əməliyyatı icra olunub. ATU-nun III Cərrahi xəxstəliklər kafedrasının assistenti, Tədris Cərrahiyyə Klinikasının ümumi cərrahı Telman Əmirovun rəhbərliyi ilə həyata keçirilən əməliyyat zamanı iltihablaşmış və böyümüş öd kisəsi tam şəkildə xaric edilib və cərrahi müdaxilə uğurla başa çatıb.

Əməliyyatdan sonra açıqlama verən ümumi cərrah Telman Əmirov bildirib ki, daşlı xolesistit zamanı xəstələrdə adətən sağ qabırğaaltı nahiyədə başlayan və sağ kürək və ya sağ çiyin nahiyəsinə yayılan kəskin tutmaşəkilli ağrılar müşahidə olunur.

Mütəxəssisin sözlərinə görə, xəstəliyin diaqnostikasında əsasən ultrasəs müayinəsi mühüm rol oynayır və əksər hallarda diaqnozun təsdiqlənməsi üçün kifayət edir.

Həkim onu da əlavə edib ki, ümumi öd yollarında daş və ya digər maneələrdən şübhələnildikdə, həmçinin öd yollarında genişlənmə aşkarlandıqda əlavə olaraq MRCP və ya ERCP müayinələri aparıla bilər. Lakin öd yollarında genişlənmə və ya tıxanma əlamətləri olmadıqda sadə USM müayinəsi diaqnozun qoyulması üçün tam yetərli hesab olunur.