Azərbaycan Cərrahiyyə, Qastroenterologiya və Onkologiya Cəmiyyətinin İdarə Heyəti üzvləri xərçəng xəstəlikləri sahəsində apardığı mühüm tədqiqatları ilə dünyanın ən qabaqcıl beynəlxalq qurumları arasında mühüm yeri olan Amerika Klinik Onkologiya Cəmiyyətinin (ASCO) hər il keçirilən ənənəvi forumunda iştirak ediblər.

Azmedinfo.az xəbər verir ki, 5 gün davam edən  "ASCO-2026" Forumu dünyanın 160-dan çox ölkəsindən olan onkoloq həkimləri, cərrahları, alim və mütəxəssisləri Çikaqo şəhərində bir araya gətirib.

"ASCO-2026" əsas diqqəti dünya miqyasında xərçəng müalicəsinin effektivliyini artırmaq üçün elmi kəşflərin klinik praktikaya çevrilməsini sürətləndirməyə yönəldib.

Xüsusilə, immunoterapiya sahəsində irəliləyişlər, onkologiyada süni intellektin tətbiq edilməsi və fərdiləşdirilmiş tibbin inkişafı əsas müzakirə obyekti olub.

"Ağciyər xərçəngi: adyuvant terapiyada irəliləyişlər, hədəf terapiyanın daha erkən başlanması", "Dövr edən şiş DNT-si, biomarkerlər və genitouriya xərçəngində həddindən artıq müalicə", "Qan xərçəngi üçün immunoterapiya və CAR-T terapiyasında əsas tədqiqatlar" və s. kimi məruzələr Forumun diqqətçəkən mövzularından olub.

Qeyd edək ki, Azərbaycan Cərrahiyyə, Qastroenterologiya və Onkologiya Cəmiyyətinin sədri, həkim onkoloq Altay Əliyev ASCO-nun üzvüdür.