Pediatriya İnstitutunda ağır vəziyyətdə olan iki azyaşlıya uğurlu tibbi yardım göstərilib

10 İyun 2026

304

Pediatriya İnstitutunda ağır vəziyyətdə olan iki azyaşlıya uğurlu tibbi yardım göstərilib

1 saylı Körpələr Evindən ağır vəziyyətdə olan azyaşlı uşaq təcili olaraq Azərbaycan Respublikası Səhiyyə Nazirliyinin K.Y. Fərəcova adına Elmi-Tədqiqat Pediatriya İnstitutuna gətirilib.

Azmedinfo.az xəbər verir ki, uşaq institutun Vaxtından Əvvəl Doğulmuşların Patologiyası şöbəsinə yerləşdirilərək şöbə müdiri və institut rəhbərliyinin birbaşa nəzarəti altında 16 gün stasionar müalicə alıb.

Azyaşlıya dərhal zəruri tibbi yardım göstərilib, kompleks müayinə və müalicə tədbirləri həyata keçirilib. İnstituta qəbul olunduğu zaman çəkisi cəmi 2 kq olan körpənin vəziyyətinin yaxşılaşdırılması istiqamətində peşəkar tibbi müdaxilələr aparılıb. Görülən tədbirlər nəticəsində uşağın ümumi vəziyyəti yaxşılaşıb və çəkisi 3000 qrama qədər artıb.

Müalicə kursu uğurla başa çatdıqdan sonra azyaşlı yenidən 1 saylı Körpələr Evinə təhvil verilib.

Digər azyaşlı isə bir həftədir davam edən yüksək hərarət, öskürək, qusma və ishal şikayətləri ilə valideynləri tərəfindən Azərbaycan Respublikası Səhiyyə Nazirliyinin K.Y. Fərəcova adına Elmi-Tədqiqat Pediatriya İnstitutuna çatdırılıb. Uşaq daha əvvəl özəl tibb müəssisəsində müayinə və müalicə alıb, lakin aparılan müalicəyə baxmayaraq vəziyyətində yaxşılaşma müşahidə edilməyib. Bu səbəbdən ixtisaslaşmış tibbi yardım göstərilməsi məqsədilə ETPİ-yə gətirilib, Somatika şöbəsinə yerləşdirilib.

Şöbə müdirinin nəzarəti altında müvafiq müayinə və müalicə tədbirlərinə başlanıldıqdan sonra artıq bir gün ərzində uşağın hərarəti normallaşıb, ümumi vəziyyətində yaxşılaşma müşahidə olunub, iştahı artıb və klinik əlamətlərində müsbət dinamika qeydə alınıb.