Böyrək transplantasiyası keçirən qadınların övlad dünyaya gətirməsi müasir tibbin ən böyük nailiyyətlərindən biri hesab olunur. Azərbaycanda bu sevinci və analıq xoşbəxtliyini yaşayanlardan biri də 1990-cı il təvəllüdlü Könül Cəlilovadır.

Azmedinfo.az Orqan Donorluğu və Transplantasiyası üzrə Koordinasiya Mərkəzinin məlumatına istinadən yazır ki, gənc yaşlarında 5-ci dərəcəli xroniki böyrək çatışmazlığı diaqnozu ilə üzləşən Könülə anası donor olub. 2015-ci ildə icra edilən uğurlu transplantasiya əməliyyatı gənc qadının həm sağlamlığını, həm də gələcək xəyallarını özünə qaytarıb.

Əməliyyatdan iki il sonra ailə quran K.Cəlilova həkimlərinə olan sonsuz güvəni ilə ana olmaq yolunda ilk addımlarını atıb. İlk hamiləliyi zamanı yüksək arterial təzyiq və bəzi tibbi fəsadlar səbəbindən körpə bir qədər tez, 31-ci həftədə dünyaya gəlsə də, həkimlərin yüksək peşəkarlığı və ananın iradəsi sayəsində uşaq sağlam şəkildə həyata tutunub.

2022-ci ildə Könül Cəlilova ikinci dəfə ana olmaq həyəcanını yaşayıb. Bu dəfə daha təcrübəli olan ana, düzgün pəhriz və ciddi həkim nəzarəti sayəsində hamiləlik dövrünü problemsiz başa vurub. Onun ikinci övladı tam vaxtında, hamiləliyin 38-ci həftəsində dünyaya göz açıb.

Bu gün Könül xanım və onun iki sağlam övladı transplantologiyanın geniş imkanlarını göstərən ən real və uğurlu örnəkdir. Müasir tibb sübut edir ki, böyrək köçürülməsi ana olmağa maneə deyil. Əksinə, bu əməliyyat dializ dövründə reallaşması qeyri-mümkün görünən analıq arzusunu gerçəyə çevirir.