Ürək-damar xəstəlikləri və müasir müalicə texnologiyaları sahəsində nüfuzlu beynəlxalq nəşr olan "Journal of Heart Disease and Therapy" (JHDT) kardiologiya elminin qlobal inkişafına mühüm töhfələr verməyə davam edir.

Azmedinfo.az xəbər verir ki, elm və innovasiyanın kəsişməsində fəaliyyət göstərən JHDT, kardiologiya sahəsində aparılan orijinal tədqiqatları, klinik halları, ekspert rəylərini və icmal məqalələrini beynəlxalq elmi ictimaiyyətə çatdıran, yüksək standartlara malik resenziyalı (peer-reviewed) elmi nəşr kimi tanınır. Jurnalın əsas missiyası qlobal miqyasda klinik yeniliklərin və innovativ yanaşmaların sürətlə yayılmasını təmin etməkdən ibarətdir.

Jurnal 2026-cı ildə elm aləmi üçün xüsusilə əlamətdar bir addım ataraq, xüsusi buraxılışını Türk Dünyası Kardio-Onkologiya Konqresi və I Beynəlxalq Süni İntellekt və Robotik Kardiologiya Sammitinə həsr edib. Bu xüsusi nəşr müxtəlif ölkələrdən olan mütəxəssislərin elmi işlərini bir araya gətirməklə, kardiologiyanın gələcək inkişaf vektorlarını, xüsusilə süni intellektin tibbə inteqrasiyasını və robotik cərrahiyyənin imkanlarını geniş şəkildə əks etdirir. Beynəlxalq elmi nəşr standartlarına sadiq qalan jurnal, eyni zamanda müəlliflər və oxucular üçün tamamilə əlverişli şərait yaradır. Belə ki, açıq giriş (Open Access) siyasəti ilə fəaliyyət göstərən jurnalda məqalələrin təqdimatı, resenziyası və çapı üçün müəlliflərdən heç bir əlavə ödəniş tələb olunmur.

Nəşrin onlayn versiyası 3078-4514, çap versiyası isə 3105-1316 ISSN nömrələri ilə Beynəlxalq ISSN Mərkəzi tərəfindən rəsmi qeydiyyata alınıb. JHDT "Crossref" sisteminin tammetnli üzvü olduğundan, dərc edilən hər bir məqaləyə unikal DOI identifikatoru təqdim edilir ki, bu da elmi işlərin qlobal platformalarda indekslənməsini və əlçatanlığını təmin edir. Elmi etikaya ciddi önəm verən redaksiya heyəti bütün materialları müstəqil ekspertlərin iştirakı ilə reytinqli resenziya prosesindən keçirir və yalnız yüksək keyfiyyət meyarlarına cavab verən işlərin nəşrinə icazə verir.

Hazırda "Impact Factor" göstəricisi beynəlxalq qiymətləndirmə mərhələsində olan jurnal haqqında ətraflı məlumat almaq və məqalə göndərmək üçün j-hdt.com rəsmi ünvanından istifadə edilə bilər.

Bu uğurlu layihə Azərbaycanın və ümumilikdə türk dünyasının elmi potensialının qlobal kardiologiya arenasında yüksək səviyyədə tanıdılması istiqamətində mühüm addım hesab olunur.