Səhiyyə Nazirliyi Ə.Əliyev adına ADHTİ-nin Plastik və Rekonstruktiv Cərrahiyyə klinikasında ölkəmizdə ilk dəfə olaraq unikal əməliyyat həyata keçirilib.

Azmedinfo.az xəbər verir ki, klinikada baş həkim Dilqəm Məmmədovun rəhbərliyi və bilavasitə iştirakı ilə tibbi komanda tərəfindən icra edilən üz iflici əməliyyatı uğurla nəticələnib.

Altı saatdan çox davam edən əməliyyat zamanı yüksək texnologiyalı super mikrocərrahiyyə metodu tətbiq olunaraq sinir köçürülməsi və əzələ transferi həyata keçirilib və nəticədə uzun müddət üz iflicindən əziyyət çəkən xəstənin funksional vəziyyəti bərpa olunub.

Xəstəlik səbəbindən mimiki hərəkətlərini tamamilə itirən, həm vizual, həm də funksional diskomfort yaşayan pasiyentdə üz əzələlərinin funksiyasının tam bərpa olunması onun cəmiyyətdə normal fəaliyyətini mümkün edib. Üç mərhələdə həyata keçirilən bu əməliyyat ölkəmizdə səhiyyə sisteminin inkişafının göstəricisi kimi qiymətləndirilir və belə ağır və mürəkkəb rekonstruktiv cərrahi müdaxilələrin artıq dövlət müəssisəsi səviyyəsində icra olunması səhiyyənin keyfiyyətcə yeni mərhələyə qədəm qoyduğunu nümayiş etdirir.

Bu gün artıq belə əməliyyatlar üçün xaricə müraciət edən vətəndaşlar həmin tibbi yardımı ölkə daxilində də əldə edə bilirlər. Səhiyyə Nazirliyinin dəstəyi ilə ADHTİ-nin nəzdində yaradılmış Plastik və Rekonstruktiv Cərrahiyyə klinikasında bu cür mürəkkəb rekonstruktiv əməliyyatların icrası üçün müasir standartlara uyğun hər cür şərait mövcuddur və klinikada rekonstruktiv, estetik və mikrocərrahiyyə əməliyyatları, yanıq və postyanıq rekonstruksiyası, onkoplastik və travma sonrası bərpa cərrahiyyəsi, kraniofasial və əl cərrahiyyəsi, dəri və yumşaq toxuma defektlərinin örtülməsi, süd vəzi və üz rekonstruksiyası, eləcə də rinoplastika, blefaroplastika, mammoplastika, liposaksiya, abdominoplastika və üz gərmə kimi estetik əməliyyatların icrası mümkündür.